قازاقستاندا كيىكتەردىڭ سانى قانشا؟

«2018-جىلى كيىكتەردىڭ سانى 215100 ءدى قۇرادى. جىل سايىن ولاردىڭ سانى 41 پايىزعا ءوسىپ كەلەدى»، - دەلىنگەن اۋىل شارۋاشىلىعى مينيسترلىگىنىڭ Facebook-تەگى رەسمي پاراقشاسىندا.

مينيسترلىكتەن حابارلانىپ وتىرعانداي، كيىكتەردىڭ بەس نەگىزگى پوپۋلياتسياسى بار: ولاردىڭ ۇشەۋى قازاقستاندا، بىرەۋى رەسەيدە (قالماقيا)، بىرەۋى موڭعوليادا تىرشىلىك ەتەدى. قازاقستانداعى پوپۋلياتسيالار - بەتپاقدالا، ورال جانە ءۇستىرت كيىكتەرى. ەلىمىزدە كيىكتەردىڭ تارالۋ اۋماعى ون وبلىس تەرريتورياسىن قامتيدى. جانۋارلاردىڭ تىرشىلىك ەتۋ اۋقىمى كورشىلەس وزبەكستان مەن رەسەي فەدەراتسياسىنىڭ جەرلەرىنە دە سوزىلعان.

سونىمەن بىرگە، اۋىل شارۋاشىلىعى مينيسترلىگى 2015-جىلى كيىكتەردىڭ جاپپاي قىرىلۋىنىڭ سەبەبىن اتادى.

«2015-جىلدىڭ 11- مامىرى مەن 5- ماۋسىمى ارالىعىندا قوستاناي، اقتوبە، اقمولا وبلىستارىندا بەتپاقدالا كيىگىنىڭ جاپپاي قىرىلۋى تىركەلگەن بولاتىن. ءىستىڭ ءمان-جايىن انىقتاۋعا ءبىلىم جانە عىلىم مينيسترلىگىنىڭ عىلىمي ۇيىمدارى مەن مامانداندىرىلعان زەرتحانالارىنىڭ (بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتى، ميكروبيولوگيا جانە ۆيرۋسولوگيا عىلىمي- زەرتتەۋ ينستيتۋتى، زوولوگيا ينستيتۋتى)، ەنەرگەتيكا مينيسترلىگىنىڭ (وبلىستىق ەكولوگيا دەپارتامەنتتەرى) وكىلدەرى جانە كورولدىك ۆەتەرينارلىق كوللەدجدىڭ (انگليا)، فرانكفۋرت زوولوگيا قوعامى (گەرمانيا)، ب ۇ ۇ ازىق-تۇلىك جانە اۋىل شارۋاشىلىق ۇيىمىنىڭ (ف ا و)، حالىقارالىق ەپيزووتيكالىق بيۋروسى جانە روسسەلحوزنادزور (رەسەي) جانۋارلار دەنساۋلىعىن قورعاۋ فەدەرالدى ورتالىعىنىڭ شەتەلدىك ساراپشىلارى جۇمىلعان ەدى. ق ر ب ع م بيولوگيالىق قاۋىپسىزدىك ماسەلەلەرى عىلىمي-زەرتتەۋ ينستيتۋتىنىڭ قورىتىندىسىنا سايكەس، اقمولا، اقتوبە جانە قوستاناي وبلىستارىندا كيىكتىڭ قىرىلۋىنا پاستەرەللەز سەبەپ بولعان»، - دەلىنگەن حابارلامادا.