قىزىلورداداعى جول اپاتى: اناسى دا، بالاسى دا تەرگەلۋدە
وسى وقيعاعا وراي سوتقا دەيىنگى تەرگەۋ امالدارى جۇرگىزىلىپ جاتىر، دەپ حابارلايدى قازاقپارات ءتىلشىسى.
ق ر ءى ءى م ىشكى جانە سىرتقى كوممۋنيكاتسيالار دەپارتامەنتىنىڭ ديرەكتورى الماس سادۋبايەۆتىڭ ايتۋىنشا، كامەلەتتىك جاسقا تولماعان جاس ءوسپىرىم وتكەن جىلدىڭ 28 -جەلتوقسان كۇنى قىزىلوردا قالاسىندا جول اپاتىن جاساپ، جاياۋ جۇرگىنشىنى قاعىپ كەتكەن. قازىرگى ۋاقىتتا سوتقا دەيىنگى تەرگەۋ امالدارى جۇرگىزىلۋدە.
«اۆتوموبيل كىنالى تۇلعانىڭ اناسىنا تيەسىلى. سول كۇنى ول اتا-اناسىنا ەسكەرتپەستەن كولىكپەن قالاعا شىعىپ كەتىپ، جاياۋ جۇرگىنشىنى قاققان. وسىدان كەيىن زارداپ شەگۋشىنى اۋرۋحاناعا جەتكىزگەن. الايدا زارداپ شەگۋشى العان جاراقاتى سالدارىنان وسى جىلدىڭ 1 -قاڭتارىندا قازا بولدى. جاسوسپىرىم ءوز كىناسىن تولىق مويىنداپ وتىر جانە تەرگەۋ بارىسىندا اناسىنىڭ قاراۋىنا جىبەرىلگەن»، - دەدى الماس سادۋبايەۆ.
سونىمەن قاتار دەپارتامەنت باسشىسى كولىك يەسىنە قاتىستى دا سوتقا دەيىنگى ءوندىرىس باستالعانىن ايتتى. ياعني، جاس ءوسپىرىمنىڭ اناسى جۇرگىزۋشى كۋالىگى جوق ادامعا كولىگىن جۇرگىزۋگە بەرگەنى ءۇشىن ايىپتالىپ وتىر.
«تەرگەۋ بارىسى ىشكى ىستەر مينيسترلىگىنىڭ باقىلاۋىندا»، - دەدى ول.