ماقپال ءجۇنىسوۆا ديماش تۋرالى: رەسەيدىڭ ءوزى وعان قاراپ نە ىستەرىن بىلمەي، ءبىرتۇرلى بوپ ءجۇر
ال بۇگىندە ماقپال حانىم ديماشتىڭ تالانتىنا الەمنىڭ ءىرى دەرجاۆالارى قىزىعا قاراپ وتىرعانىنا سەنىمدى.
بۇل تۋرالى ءجۇنىسوۆا ايگەرىم سەيفوللانىڭ «سىرلاسۋ» باعدارلاماسىندا ايتتى.
«ديماش - ول 1000 جىلدا ءبىر تۋاتىن شىعار. ول شىنىمەن دە قازاق حالقىنىڭ ماڭدايىنا بىتكەن جارىق جۇلدىز دەپ ايتسام، ارتىق ايتقان بولمايمىن. ديماشتى قايتالاۋدىڭ قاجەتى جوق. ديماش - ۋنيكۋم، ول جالعىز. قازاقستاندا ول بىردەن باعىن اشا المادى. مەن باسىندا- اق قانات پەن سۆەتاعا، ديماشتىڭ كىشكەنتاي كەزىندە ايتقانمىن. بۇل بالانى قازاقستاندا بايقاۋعا قاتىستىرىپ، تاڭعالدىرامىن دەپ ويلاماڭدار. بۇندايدى بىزدە قابىلدامايدى دەپ ايتقانمىن»، - دەيدى ءجۇنىسوۆا.
حالىق ءارتيسىنىڭ ايتۋىنشا، مەملەكەت كەزىندە ءبىرتۋار دارىن يەلەرىن ۋاقىتىندا باعالاي العان جوق. ايتپەسە قازاق ەلىندە الەمدى تاڭداي قاقتىرار تالانتتار كوپ بولدى، دەيدى ءجۇنىسوۆا. ءارى ول عالامتور دامىعان زاماندا جەلى ارقىلى تانىلۋ دا وڭاي دەگەن پىكىردە.
«كەزىندە ەرىك قۇرمانعاليەۆ دەگەن دە بولدى عوي. ول دا شەتەلگە كەتىپ، قانشاما اتى شىقتى. ءبىراق ول كەزدە ينتەرنەتتىڭ زامانى ەمەس ەدى. YouTube دەگەن جوق. سوندىقتان دا ونىڭ اتى شىقپاي قالدى دەپ ايتۋدىڭ ءوزى كۇنا. ول شەتەلدە كادىمگىدەي جاقسى اقشا تاۋىپ، اتى شىققان ادام. ونى كورسەتپەدى.
كەزىندە بىزدە الىبەك دىنىشيەۆ، ەرمەك سەركەبايەۆتار دا جامان بولعان جوق. كۇلاش، بيبىگۇل اپالارىمىزدى، داۋسى بار انشىلەردى مەملەكەت دۇرىس پايدالانا الدى ما؟ جوق. ەگەر دە ول كىسىلەردى دە جاقسىلاپ جارنامالاپ، شەتەلدىك كونكۋرستارعا شىعارسا... مىسالى، سەمبەك جۇماعاليەۆتىڭ داۋسى قانداي بولدى؟ ! ول دا ەسترادالىق بايقاۋدان ورىن الىپ كەلگەن، ءبىراق جاتاقحانادا 10 -جىل تۇردى. يا ءۇي بەرىلگەن جوق، ۋاقىتىمەن ونى قولداعان جوق ەشكىم. بىزدە ءالى دە بار»، - دەيدى قازاقتىڭ ەركە قىزى.
ءجۇنىسوۆانىڭ ايتۋىنشا، بۇگىندە ديماش باعىندىرعان بيىككە بۇعان دەيىن بىردە ءبىر قازاق بالاسى شىقپاعان.
«ال ەندى ديماش قازىر الەمدىك دەڭگەيدە جەكە كونتسەرتتەرىن بەرىپ جاتىر. مايكل دجەكسون سياقتى. ول قازاقتاردا بولماعان نارسە. بىزدە حالىقارالىق دەڭگەيدەگى ءانشىمىن دەپ سويلەيتىن ادامدار بار عوي. بۇكىل الەمدى جاۋلاپ العانداي بولىپ سويلەيتىن ادامدار بار. ءبىراق ونداي بولماعان. ەشكىم جەكە كونتسەرت بەرمەدى. ءبىز دە شەتەلدە بولدىق، ءبىراق ءبىز 4-5 ءاننىڭ كولەمىندە عانا ايتىپ كەلەتىنبىز. ال بىلاي ستاديوندارعا بەرگەن ەمەسپىز. قازىر ءبىز ديماشتى كۇندە كورىپ، ماقتانىپ جاتىرمىز. رەسەيدىڭ ءوزى ءقازىر نە ىستەرلەرىن بىلمەي، ءبىرتۇرلى بوپ ءجۇر. قۇداي ءوزى ءتىل- كوزدەن ساقتاسىن، ونىڭ داۋسى قازىر 6 وكتاۆاعا دەيىن جەتىپ قالدى. ول كۇندەلىكتى ءوزىن- ءوزى باپتاپ، تەك قانا دۇرىس جولمەن ءجۇرىپ، اللا بەرگەن داۋسىن دۇرىس باعىتتا پايدالانىپ جاتىر»، - دەپ اعىنان جارىلدى ول.
Stan.kz