ماقپال ءجۇنىسوۆا باسقا قىزدى جۇكتى ەتىپ، ءوزىن تاستاپ كەتكەن جىگىتى تۋرالى ايتتى

 استانا. قازاقپارات - ماقپال ءجۇنىسوۆا حالىقتىڭ الدىنداعى بەدەلى مەن ابىرويىن ساقتاپ قالۋ ءۇشىن بۇگىندە كوپ جۇمىس ىستەيدى.

ساحنانىڭ ادامى بولعاندىقتان، ءانشى ءار قادامىن اڭداپ باسۋعا تىرىسادى، سونداي- اق سىرتقى كەلبەتى مەن دەنساۋلىعىنا ءجىتى ءمان بەرەدى. الايدا ونىڭ ءبارى ءجۇنىسوۆاعا ءبىر كۇندە كەلە قويعان جوق.

ءبىر كەزدەرى تالماي- تىنباي ۇكىمەتكە جۇمىس ىستەگەن ول سونىڭ كەسىرىنەن دەنساۋلىعىنا دا زاقىم كەلتىرىپ العان. بۇل تۋرالى حالىق ءارتيسى ايگەرىم سەيفوللانىڭ «سىرلاسۋ» باعدارلاماسىندا ايتتى.

بۇل ورايدا ءانشى جاس كەزىندە نەگە بالانى كوپ تۋماعانىن ايتتى.

«ول كەزدە دەنساۋلىعىم دۇرىس بولمادى. مەن بىردەن حالىق ءارتىسى بولىپ كەتكەن جوقپىن عوي، مەملەكەتتىك سىيلىقتى العاننان كەيىن، وسى اتاق- داڭققا ساي بولۋ كەرەك دەپ ءوزىمدى ءوزىم كۇتىپ ەڭبەكتەنگەنىم راس. جالپى 1-2 بالا ءتۇسىپ قالدى، بىرنەشە وتادان ءوتتىم، اۋرۋحانادا دا جاتتىم. اتاقتى مۇستافايەۆ دەگەن كىسى وپەراتسيا جاسادى. سونداي- سونداي قيىندىقتاردان وتتىك»، - دەيدى ءانشى.

ونىڭ ۇستىنە ءجۇنىسوۆا جاستاي تۇرمىسقا شىقپاعاندىقتان دا، بالا كوتەرۋىم قيىن بولدى، دەيدى.

«زاكەڭ مەنى 26 جاسىمدا قاعىپ الىپ كەتتى. وعان دەيىن كۇيەۋگە شىقپاعان اداممىن. جاتاقحانادا 9  جىل تۇردىم. 4 قىز ءبىر بولمەدە. مەنىڭ ارتىمنان ەشكىم جۇگىرمەدى دەي المايمىن. قۇدايعا شۇكىر، ءاپ- ادەمى قىز بولدىق، تالاي جىگىتتەر جۇرەگىن ۇستاپ، حات جازىپ، عاشىقپىن دەگەندەر بولدى. ءبىراق بىزدەر جوسپار بويىنشا، ايىنا 60 كونسەرت بەرەتىن ەدىك. «گۇلدەر» ءانسامبلىنىڭ جوسپارى بولاتىن، ءبىز تەك ۇكىمەتكە جۇمىس جاسادىق. ول كەزدە مەن 90 سوم عانا الامىن مەن. ءبىراق ءبىز كۇندە ستانسيا، سوۆحوز، كولحوز، ءبارىن قاتار- قاتار، ۇلكەن اۆتوبۋستارعا ءمىنىپ الىپ، ارالاپ جۇردىك. كۇيەۋگە شىقپادىق، ۇكىمەتتىڭ پلانىن جاسادىق»، - دەيدى حالىق ءارتيسى.

سۇحبات بارىسىندا حالىق ءارتيسى وسى ۋاقىتقا دەيىن ەشكىمگە ايتپاعان جان سىرىمەن ءبولىستى. ءجۇنىسوۆا جاس كەزىندە ايىرىلىپ قالعان ماحابباتى تۋرالى سىر شەرتتى.

«جاقسى كورەتىن جىگىتىم بولدى. ول بايعۇس ءبىر قىزدىڭ وبالىنا قالىپ، ەكىقابات قىلىپ قويعان سوڭ، سوعان ۇيلەنۋگە تۋرا كەلدى. ويتكەنى سوتتاتامىز دەدى. سونىمەن ماحابباتپەن قوشتاستىم. جىلاپ، 4-5 جىل «كەتسەڭ دە شالعاي»، «اققۋ سەنىمدى» ايتىپ جۇرگەن كەزىم سول بولاتىن»، - دەپ اعىنان جارىلدى ول.

Stan.kz