تانىمال سپورتشىلار قازاقستاندىقتاردى جاڭا جىلمەن قۇتتىقتادى

گەننادي گولوۆكين جانكۇيەرلەرىن جاڭا جىلمەن بىلاي دەپ قۇتتىقتادى: «2018-جىلى قولداۋ كورسەتكەندەرىڭىز ءۇشىن راحمەت! سىزدەرگە، وتباسىلارىڭىزعا باقىت، بەرەكە، تابىس تىلەيمىن! جاڭا جىل باقىت اكەلسىن! جاڭا 2019-جىل قۇتتى بولسىن!» - دەپ جازدى ول Instagram پاراقشاسىندا.

ەكى تۇجىرىم بويىنشا بۇرىنعى الەم چەمپيونى جانات جاقيانوۆ: «بارشاڭىزدى كەلە جاتقان 2019-جىلمەن قۇتتىقتايمىن! سىزدەرگە مىقتى دەنساۋلىق جانە وتباسىلىق بەرەكە تىلەيمىن! ەلىمىز ءاردايىم گۇلدەنە بەرسىن! جاڭا جىل قۇتتى بولسىن!»، - دەدى ول قازاقپارات تىلشىسىنە.

ەسكە سالا كەتەيىك، بيىل اقپان ايىندا بوكسشى كاسىبي مانسابىن اياقتاعان بولاتىن.

«مەن كارەرامدى اياقتايمىن دەپ شەشىم قابىلدادىم. وعان نەگىز بولعان سەبەپتەر از ەمەس. مەن 3-4 اي بويى ويلانىپ، بۇگىن مىنە، ءتيىستى شەشىم قابىلدادىم. وسى ۋاقىتقا دەيىن مەنى قولداپ كەلگەن ازاماتتاردىڭ بارلىعىنا العاسىمدى بىلدىرگىم كەلەدى. ءبىرىنشى كەزەكتە مەن جانكۇيەرلەرىمە العىس ايتامىن. سونداي-اق باقيلىق بولعان باپكەرىم، الەكساندر نيكولايەۆيچ لەبەديەۆكە العىم شەكسىز. باپكەرلەرىم ريككي حاتتون، مايك دجەكسون، ۆيكتور يۆانوۆقا باسىمدى يەمىن. مەنەدجەرلەرىم فيليپپ فونديۋ مەن ەرىك جايلاۋوۆقا راحمەت. بۇلاردىڭ بارلىعى دا ماعان بارلىق جاعىنان قولداۋ كورسەتكەن ازاماتتار. مەن ۇلكەن جولدان ءوتتىم، ەندى سونى اياقتايتىن ۋاقىت تا جەتكەن سياقتى»، - دەپ مالىمدەگەن بولاتىن سول كەزدە جانات جاقيانوۆ.

ال كۇزدە بۇرىنعى چەمپيون بوكستان وليمپيادا رەزەرۆىنىڭ سولتۇستىك قازاقستان وبلىستىق مامانداندىرىلعان بالالار مەن جاس وسپىرىمدەر مەكتەبىنە باسشى بولىپ تاعايىندالدى.

قازاقستاندىق رەكوردشى، قارا كۇش يەسى سەرگەي تسىرۋلنيكوۆ: «بارشاڭىزدى جاڭا جىلمەن قۇتتىقتايمىن، ادامدارعا باقىت پەن ىزگىلىك تىلەيمىن. ەڭ باستىسى - ماقساتقا ادال بولۋ. جاڭا جىل تابىس اكەلسىن، قادىرلى دوستار!»، - دەپ تىلەكتەرىن جاۋدىردى قازاقپارات ءتىلشىسى ارقىلى.

مامىر ايىندا سەرگەي سالماعى 148 توننالىق ۆاگون تىركەۋلى تەپلوۆوزدى بىرنەشە مەترگە سۇيرەپ اپارىپ، كەزەكتى رەكوردىن ورناتقان بولاتىن.