فرانسيالىقتار اسىراپ العان بالا اعاسىن قىرعىزستاننان تاپتى
بىشكەك. قازاقپارات - ن ت ۆ تەلەارناسىنىڭ «جدي مەنيا» حابارىنىڭ 28 - جەلتوقسانداعى شىعارىلىمى فرانسيالىق بالانىڭ تاعدىرىنا ارنالدى. بالا ءوزىنىڭ تۋىستارىن قىرعىزستاننان تاپتى، دەپ حابارلايدى «كابار» اگەنتتىگى.
كيريلل نيكول مورشتى ەكى جاسىندا فرانسۋز وتباسى اسىراپ الادى. كوپ جىلدار بويى ءوزىنىڭ تەگى تۋرالى بىلگىسى كەلگەن بالا جاڭا جىل قارساڭىندا اياز اتاعا ەمەس، «جدي مەنيا» حابارىنىڭ رەداكسياسىنا حات جازادى. حابار اۆتورلارى كيريلدىڭ تۋىستارىن، وشتا تۇراتىن 16 جاستاعى اعاسى اقىلبەكتى تابا الدى. كوگىلدىر ەكران ارقىلى ءبىر- ءبىرىن كورگەن بالالار كوز جاسىنا ەرىك بەرىپ، مىندەتتى تۇردە كەزدەسۋگە ۋادە ەتتى.
بالالاردىڭ اناسى تولقىناي ماسكەۋدە تيىن- تەبەن ءۇشىن ەڭبەك ەتىپ ءجۇرىپ، كيريلدى ومىرگە اكەلەدى. وكىنىشكە قاراي، بوسانعاننان كەيىن كوپ ۇزاماي ايەلدىڭ دەرتى اسقىنىپ كوز جۇمادى. وسى وقيعا الەۋمەتتىك جەلىدە قىزۋ تالقىعا ءتۇسىپ، كيريلدى باعىپ- قاعىپ وتىرعان فرانسۋز وتباسىنا العىسىن جاۋدىردى. ريزا بولعاندىعى سونشالىق، ءتىپتى بالانىڭ فرانسۋز اناسى مەن اجەسىنە ۇقسايتىن تۇستارىن تاپقاندار دا بولدى.