تۇركيادا قاۋىپسىزدىك كۇشەيتىلدى
استانا. قازاقپارات - جاڭا جىل مەرەكەسى قارساڭىندا تۇركيادا قاۋىپسىزدىك شارالارى كۇشەيتىلدى، دەپ حابارلايدى «حابار 24».
ەلدەگى 81 پروۆينتسيا مەن وعان قاراستى اۋدان تۇرعىندارىنىڭ تىنىشتىعى مەن قاۋىپسىزدىگىن ساقتاۋ ماقساتىندا قوسىمشا ساقشىلار مەن اسكەري تەحنيكالار جۇمىلدىرىلاتىن بولدى.
اسىرەسە، پوليتسەيلەر مەن مەملەكەتتىك كۇزەتشىلەر، 31 - جەلتوقسان كۇنى حالىق كوپ شوعىرلاناتىن جەرلەردى، اتاپ ايتقاندا اۋەجاي، ساپارجاي، ساۋدا جانە ويىن- ساۋىق ورتالىقتارىندا قاداعالاۋدى ارتتىرادى. سونداي- اق، ىشكى ىستەر مينيسترلىگى، قالا كوشەلەرىندە ورناتىلعان «قاۋىپسىزدىك بەينە كامەرالارىنىڭ» جۇمىسىن الدىن الا تەكسەرۋدەن وتكىزدى. سونىمەن قاتار، جاڭا جىلدا جول پوليتسەيلەرىنىڭ سانى ارتادى.
ايتا كەتكەن ءجون، ازىرگە مادەني ءىس- شارالاردى ۇيىمداستىرۋعا تىيىم سالىنعان جوق. «جاڭا جىل قارساڭىندا قاۋىپسىزدىكتىڭ كۇشەيتىلگەنى دۇرىس. سەبەبى ول كۇنى دۇكەندەر مەن ءبىز سەكىلدى كاسىپورىندار ءتۇن جارىمعا دەيىن حالىققا قىزمەت كورسەتەدى. ءار ءتۇرلى جاعداي بولۋى مۇمكىن. مۇنىڭ الدىن الۋ ءۇشىن ءتارتىپ ساقشىلارىنىڭ ونى قاداعالاعانى ءجون»، - دەيدى كاسىپكەر ۆولكان كابار.