استانادا جاڭا مەشىت اشىلدى
استانا. قازاقپارات - ەلوردانىڭ «الماتى» اۋدانىنداعى ع. مۇستافين كوشەسىندە جاڭا مەشىت اشىلدى. ول وزگە مەشىتتەردەن قۇرىلىسىمەن ەرەكشەلەنەدى، دەپ حابارلايدى استانا قالاسى اكىمدىگىنىڭ رەسمي سايتى.
«اق مەشىت» مەشىتىنىڭ اشىلۋ سالتاناتىنا ارنالعان يگى شاراعا قازاقستان مۇسىلماندارى ءدىني باسقارماسىنىڭ ءتوراعاسى سەرىكباي قاجى وراز قاتىسىپ، جاڭادان اشىلعان مەشىت رۋحاني ورتالىق بولا وتىرىپ ەلوردانىڭ ساۋلەتتىك كەلبەتىن اشا تۇسكەنىن ايتتى.
ونىڭ ايتۋىنشا، مەشىت مۇسىلمانداردىڭ ءمىناجات ورنى بولۋمەن قاتار، بەيبىتشىلىك پەن كەلىسىم جانە قازاق ەلىنىڭ تاريحىن، سالت- ءداستۇرىن وقۋ ورتالىعى سونداي- اق، ۇلتارالىق جانە كونفەسسياارالىق كەلىسىمدى نىعايتۋ الاڭى بولادى.
جاڭادان اشىلعان «Aq meshit» مەشىتىنىڭ عيماراتى تولىعىمەن اق مارمارمەن كومكەرىلگەن.
قۇرىلىستىڭ بىرەگەيلىگى مۇنارالاردىڭ سانىندا. مەشىتتەردە ءداستۇر بويىنشا ءتورت مۇنارا بولادى. ارحيتەكتورلاردىڭ سىزباسى بويىنشا جاڭا مەشىتتە ەكى مۇنارا بار. ءبىراق، ءۇش ءتۇرلى ستيلدەگى سەكسيالاردان تۇرادى.
«اق مەشىتتە» ءبىر مەزەتتە 1200 ادام قۇلشىلىعىن وتەي الادى. مەشىت جانىندا سالىنعان مەدرەسە 75 ادامعا ارنالعان. مەشىتتە ەرلەر مەن ايەلدەر ارنالعان ناماز زالى، نەكە قيۋ بولمەسى، ءماجىلىس زالى، قۇران وقۋعا ارنالعان بولمە، مەيرامحانا جانە ءمايىتحانا بار.
مەدرەسەدە ساباق وتەتىن 9 اۋديتوريا، وقۋشىلار مەن وقىتۋشىلاردىڭ تۇرۋىنا ارنالعان 28 بولمە بار.
سونىمەن قاتار، مۇندا كىتاپحانا، جاتتىعۋ زالى، جەكە اسحانا، مەديتسينالىق پۋنكت، شاشتاراز جانە كيىم جۋۋ بولمەسى بار. مەدرەسەنى اشۋداعى ماقسات - رۋحاني تاربيە بەرۋ.