باقىتجان ساعىنتايەۆ وبلىس اكىمدەرىنە: قانشاما زاۋىت اشتىڭىزدار - ناتيجە قايدا؟
ەسكە سالا كەتسەك، بۇگىنگى ۇكىمەت وتىرىسىندا يندۋستريا جانە ينفراقۇرىلىمدىق دامۋ ءمينيسترى جەڭىس قاسىمبەك ۇكىمەت باسشىسىنان وڭدەۋ ونەركاسىبىندەگى ەڭبەك ونىمدىلىگىنىڭ ءوسىمىن قامتاماسىز ەتۋ شارالارىن قابىلداۋ ءۇشىن وڭىرلەرگە تاپسىرما بەرۋدى سۇراعان بولاتىن. ونىڭ ايتۋىنشا، ەڭبەك ونىمدىلىگىن ارتتىرۋعا كەدەرگى بولاتىن فاكتورلاردىڭ ءبىرى - وڭدەۋ ونەركاسىبى سالالارىن دامىتۋدىڭ تەحنولوگيالىق دەڭگەيى بولىپ وتىر.
جەڭىس قاسىمبەكتىڭ بايانداماسىن تىڭداعان ۇكىمەت باسشىسى ءوڭىر اكىمدەرىنىڭ ەسىنە پرەزيدەنتتىڭ بەرگەن تاپسىرماسىن سالدى.
«ەلباسى ءوز سوزىندە بۇل ماسەلە تۋرالى ايتىپ وتكەن ەدى. ءتيىستى تاپسىرما بەرگەن دە بولاتىن. جىلدىڭ اياعىندا مۇمكىن، ءاربىر جارتىجىلدا وڭىرلەردىڭ رەيتينگىن جاساپ وتىرۋ بويىنشا... بۇگىنگى سىزدەردىڭ باياندامالارىڭىزدان كورىپ وتىرمىز، سىزدەر سەبەبىن ىزدەپ وتىرسىزدار. ەڭبەك ونىمدىلىگىنىڭ وسپەگەنىنە ادام سانى كوبەيدى دەگەن سياقتى باسقا دا سەبەپتەر ايتىلىپ جاتىر. وندا ءاربىر يندۋستريالاندىرۋ كۇنىندە سىزدەر قوسىپ وتىرعان زاۋىت-فابريكالار نەگە ەڭبەك ونىمدىلىگىنىڭ وسىمىنە اسەر ەتپەيدى. ءبىر عانا زاۋىتتىڭ جۇمىسى ناشارلاپ قالسا، ەڭبەك ونىمدىلىگىن ارتقا تارتىپ كەتەدى. باسقا جۇمىس جوق. ءبىر عانا زاۋىتقا تاۋەلدىمىز»، - دەدى باقىتجان ساعىنتايەۆ ءوز سوزىندە.
ۇكىمەت باسشىسى اۋىل شارۋاشىلىعى نەمەسە تاماق ونەركاسىبى، باسقا سالا بولسىن بارىندە ءتيىستى ءوسىمنىڭ قول جەتكىزىلمەگەنىنە ءبىر سىلتاۋ ايتىلاتىنىنا شۇيلىكتى.
«سوندا باسقا جۇمىس جوق پا؟ جۇيەلى جۇمىس قايدا؟ مىڭداعان زاۋىت اشتىق دەپ ايتىپ جاتىرمىز. ال نەگە ولاردىڭ ءبارى ەڭبەك ونىمدىلىگىنىڭ جوعارىلاۋىنا اسەر ەتپەيدى؟ سوندا قانداي زاۋىتتار اشىپ جاتىرسىزدار. جىلدىڭ قورىتىندىسى شىققان كەزدە جەڭىس ماحمۇد ۇلى (قاسىمبەك - اۆت.) تاعى قارايمىز. قازىر مىنە، ارىپتەستەرىمىز ايتىپ وتىر عوي، جارتى جىلدىڭ قورىتىندىسى وسىنداي - ال جىلدىڭ قورىتىندىسىمەن ءبارىن دۇرىستايمىز دەپ... جىل ءبىتتى. قايتىپ دۇرىستايسىزدار ونى. بۇگىنگە دەيىن ىستەلمەگەن جۇمىس ەرتەڭ دە ىستەلمەيدى. سول سەبەپتى وسى ماسەلەنى ءار كەز ەستە ۇستاۋ كەرەك. اسقار ۇزاقباي ۇلى، جارتى جىلدا ءبىر رەت بۇل سۇراقتى باقىلاۋعا الىپ، ارىپتەستەرىمىزدىڭ ايتىلعان ۋادەلەرىن حاتتاما ارقىلى بەكىتىپ، سونى سالىستىرمالى تۇردە قاراپ وتىرعان ابزال. ەلباسىنىڭ تاپسىرماسى تولىق ورىندالۋى قاجەت»، - دەدى ۇكىمەت باسشىسى.