پرەزيدەنت قازاقستانداعى قارجى جۇيەسىنىڭ بۇگىنگى دەڭگەيىنە باعا بەردى

استانا. قازاقپارات - قازاقستانداعى قارجى جۇيەسى قاناعاتتانارلىق دەڭگەيدە. بۇل تۋرالى جىل قورىتىندىسى بويىنشا ەلىمىزدىڭ ب ا ق وكىلدەرىمەن كەزدەسۋ بارىسىندا ق ر پرەزيدەنتى نۇرسۇلتان نازاربايەۆ ءمالىم ەتتى، دەپ حابارلايدى قازاقپارات.

«بۇگىندە قازاقستاندا 28 بانك جۇمىس ىستەپ جاتىر. ونىڭ ىشىندە 14 ءى شەتەلدىك كاپيتالدىڭ قاتىسۋىمەن، ال قالعان 14 ءى قازاقستاندىق بانكتەر. سوڭعى كەزدەرى ۇلتتىق بانك 5 ءىرى بانككە قولداۋ كورسەتتى. ونىڭ ىشىندە «قازكوممەرتسبانك» بار، ول «ب ت ا بانكتىڭ» بارلىق قارىزىن ءوز موينىنا العان ەدى. وندا 2,4 تريلليون تەڭگە سالۋ كەرەك بولدى. ۇلتتىق بانك تاراپىنان وسى شارالار اتقارىلدى. بۇل قارجىنىڭ بارلىعى قايتارىمدى، نەسيەلەردى قيىن كەزدە الىپ، كەيىن قايتارادى. ەگەر دە جالپى كورسەتكىشكە توقتالساق، ەكونوميكانى نەسيەلەۋ 26 پايىزعا ارتىپ، بانكتەر اكتيۆى 29 پايىزعا ءوستى. جالپى، جاعدايدى قاناعاتتانارلىق دەپ ساناۋعا بولادى. دەگەنمەن، پروبلەمالار بار. سايكەسىنشە، ولاردى شەشۋ كەرەك»، - دەدى پرەزيدەنت.

ەلباسى بانكتەردىڭ ساپاسىز جۇمىسىنان سالىمشىلار زارداپ شەكپەۋى تيىستىگىن قاداپ ايتتى. ول ءۇشىن ارنايى ساقتاندىرۋ قورى بار.

ن. نازاربايەۆ بۇگىنگى مۇمكىندىكتەر بولاشاققا وپتيميزممەن قاراۋعا جول اشىپ وتىرعانىن جەتكىزدى. ەلىمىزدە التىن-ۆاليۋتا قورى ەلەۋلى كولەمدە جيناقتالعان.

«قيىندىقتار بولادى. ياعني، بۇل قيىندىقتار بانك اكتسيونەرلەرىنىڭ، مەنەدجمەنتىنىڭ تاجىريبەسى دەڭگەيىنىڭ ازدىعىنان بولۋى مۇمكىن. ۇلتتىق بانك بۇل باعىتتاعى ماسەلەلەردى باقىلاۋدا ۇستاپ وتىر»، - دەدى مەملەكەت باسشىسى.