ەلباسى: جاستار تاۋەلسىزدىكتىڭ قادىرىن بىلەر دەپ سەنەمىن

بۇل تۋرالى وتاندىق ب ا ق وكىلدەرىمەن كەزدەسۋى بارىسىندا مەملەكەت باسشىسى نۇرسۇلتان نازاربايەۆ اتاپ ءوتتى، دەپ حابارلايدى قازاقپارات ءتىلشىسى.

«ەندىگى جىلدى «جاستار جىلى» دەپ جاريالادىق. ول تۋراسىندا ارنايى باعدارلاما قابىلداۋ كەرەك. جاستارعا نە كەرەك - ءبىرىنشى ءبىلىم، ەكىنشىدەن ۇيلەنەتىن بولسا ءۇي-جاي قاجەت. جاعداي جاسالىپ، جۇمىس بەرىلۋى ءتيىس. ءتورت نارسە. سودان كەيىن بىزدە «اۋىل - ەل بەسىگى»، «جاسىل ەل»، «پاتريوتتىق سارباز» دەگەن باعدارلاما بار. ولارعا ارنايى جاعداي جاساپ، جاستاردىڭ قابىلەتىن كوتەرۋىمىز كەرەك. اسىرەسە، جاسالىپ جاتقان شارۋانى، قازاقستاننىڭ تاۋەلسىزدىگىن (جاستار - اۆت.) قادىرلەيتىن بولار دەپ ويلايمىن. سوعان سەنەمىن»، - دەدى نۇرسۇلتان نازاربايەۆ.

ەلباسىنىڭ ايتۋىنشا، ەندىگى جاستار قازاقستاننىڭ تاۋەلسىزدىگىن ساقتاپ قالۋعا ۇمتىلماسا - ەلىمىزدىڭ بولاشاعى بۇلىڭعىر بولادى.

«سول ءۇشىن بالاباقشا، مەكتەپتەن باستاپ پاتريوتتىق تاربيە كەرەك. ءبىلىم بويىنشا از شارۋا جاسالعان جوق. تاۋەلسىزدىك العان جىلدان بەرى 1500 مەكتەپ سالىنعان. بالاباقشامەن قامتۋدى 36 دان 95 پايىزعا دەيىن جەتكىزدىك. بۇل - وتە ۇلكەن جەتىستىك. ءدال سول جەردەن باستاپ بالانىڭ ءبىلىم جولى باستالادى. سوندىقتان، «جاستار جىلى» ءبارىمىز بىرىگىپ جۇمىس ىستەيتىن بولامىز. ەندىگى جىلدىڭ باسىندا سول ماسەلە جونىندە جينالىس بولادى. جاستارمەن اقىلداسامىز. ءار وڭىردە مەملەكەت تاراپىنان جاسالىپ جاتقان شارۋا كوپ. جاتاقحانا، گرانت دەگەن جاستاردىكى»، - دەدى نۇرسۇلتان نازاربايەۆ.

مەملەكەت باسشىسى ءوز سوزىندە ەلدە جاسالىپ جاتقان ەڭبەكتەردىڭ ءبارى دە بولاشاق ۇرپاقتىڭ قامى ءۇشىن اتقارىلىپ جاتقانىن ءسوز ەتتى.

ەسكە سالا كەتسەك، ق ر پرەزيدەنتى نۇرسۇلتان نازاربايەۆ قازاقستان حالقىنا بيىلعى جولداۋىندا 2019-جىلدى جاستار جىلى دەپ جاريالاۋدى ۇسىنعان بولاتىن. پرەزيدەنت ءوز سوزىندە جاستاردىڭ بارلىق ساناتىن قولداۋعا ارنالعان شارالاردى تولىق قامتيتىن الەۋمەتتىك ساتىنىڭ اۋقىمدى پلاتفورماسىن قالىپتاستىرۋ كەرەكتىگىن ايتقان بولاتىن.

ال، ارادا ءبىر ايدان استام ۋاقىت وتكەندە ەلباسى جارلىعىمەن 2019-جىل جاستار جىلى دەپ جاريالاندى.