پرەزيدەنت قازاقستان پوليتسياسىن رەفورمالاۋ قالاي جۇرگىزىلەتىنىن ايتىپ بەردى

«ءبىز حالىق اراسىندا ساۋالناما جۇرگىزگەن ەدىك. مەن سول كەزدە كوپشىلىكتىڭ قۇقىق قورعاۋ ورگاندارىنا دەگەن نارازىلىعى بارىن ءبىلدىم. اسىرەسە، ءبىزدىڭ سپورتشىمىز دەنيس تەنمەن بولعان وقيعا... كۇندەلىكتى قىلمىستىڭ تىزبەگىن وقىپ وتىرسام، جول-كولىك وقيعاسى سالدارىنان كۇنىنە 10-15 ادام قايتىس بولىپ جاتادى. كىسى ءولىمى بويىنشا دا كۇنىنە 4-5 جاعداي تىركەلەدى. ءبىراق، بۇل جاعداي (دەنيس تەننىڭ ءولىمى) رەزونانس تۋدىردى. قازىر بۇل قىلمىستى جاساعانداردىڭ ءىسى بويىنشا سوت وتىرىستارى ءوتىپ جاتىر. بۇل جاعدايعا عانا ەمەس، جالپى پوليتسيا جۇمىسىنا دەگەن نارازىلىق بار»، - دەدى نۇرسۇلتان نازاربايەۆ وتاندىق ب ا ق وكىلدەرىمەن كەزدەسۋ بارىسىندا.

پرەزيدەنت سول سەبەپتى وسى ماسەلەگە ءجىتى نازار اۋدارىپ، پوليتسيامەن وتە تىڭعىلىقتى جۇمىس جۇرگىزۋ كەرەكتىگىن اتاپ ءوتتى.

«بىرىنشىدەن، پوليتسيانىڭ جاڭا كەلبەتىن جاساۋىمىز كەرەك. ول ءۇشىن قازىرگى تاڭدا شەنەۋنىكتەردى ازايتۋ كەرەك دەپ شەشتىك. 12 وقۋ ورنىنىڭ بەسەۋى عانا قالادى. قازىر ولاردا ءۇش ادامعا ءبىر كومانديردەن كەلەدى. ەندى جوق دەگەندە بەسەۋىنە ءبىر كوماندير قىلماقپىز. بۇنىڭ بارىنەن ۇنەمدەلگەن قاراجاتقا پوليتسەيلەردىڭ ايلىق جالاقىسىن ارتتىرامىز. ەكىنشىدەن، باتىستا پوليتسيا اكادەمياسىندا جارتى جىل عانا وقيدى. بىزدە بولسا، بەس جىل بويى وقيدى دا، بۇل ۇزاق وقۋدان ەشقانداي پايدا بولمايدى. سوندىقتان، بەس وقۋ ورنىندا وسىنداي اكادەميا قۇرامىز. بەس-التى اي جاس ورەندى وقىتىپ، شەن بەرىپ، الگى قىزمەتكەر جۇمىسقا اتتانادى. مەنىڭ ويىمشا، ج و و- لارداعى زاڭگەرلىك فاكۋلتەتتەردى بىتىرەتىن كوپ جىگىتتەردى سول جاققا قاراي تارتۋعا بولادى» - دەدى ەلباسى.

نۇرسۇلتان نازاربايەۆتىڭ ايتۋىنشا، بارلىق پوليتسيا ۋچاسكەلەرىندە فرونت-كەڭسەلەر بولۋى كەرەك. ول جەرگە قاراپايىم ازامات كەلىپ، كەز كەلگەن سۇراقتارىنا جاۋاپ الا الۋى ءتيىس.

«ياعني، ازاماتتاردىڭ پوليتسياعا دەگەن سەنىمى بولۋى كەرەك. قازاقستاندىق پوليتسيا قىزمەتكەرلەرى - ءبىرىمىزدىڭ تۋىسىمىز، ءبىرىمىزدىڭ بالامىز نەمەسە باۋىرىمىز. ءبىزدىڭ ولاردىڭ جۇمىسىنا قولداۋ بىلدىرگەنىمىز ابزال. وسى جىلداردىڭ ىشىندە مەن اتاپ وتكەنىمدەي، 779 پوليتسەي قايتىس بولعان. دەمەك، ولار ەكى قولىن توبەسىنە قويىپ، بوس وتىرعان جوق. ولاردىڭ اراسىندا وتە ادالى دا بار. ونى دا ەسكەرۋ كەرەك. سول سەبەپتى، پوليتسيا بەينەسىن مۇلدە باسقاشا ەتۋ ءۇشىن ءبارىن دە تۇبەگەيلى وزگەرتەتىن بولامىز. ولارعا ياعني، جاقسى كىرىسپەن بىرگە جاۋاپكەرشىلىك تە ارتتىرۋ كەرەك. ءتيىستى الەۋمەتتىك پاكەتپەن دە قامتاماسىز ەتىلۋى ءتيىس. ەگەر ول ءوز مىندەتتەمەسىن لايىقتى اتقارا المايتىن بولسا، ول وسى ارتىقشىلىقتاردىڭ بارىنەن، زەينەتاقىسىنا دەيىن ايىرىلاتىن بولادى. سوت جۇيەسىندە دە سولاي. سوتتاردى ىرىكتەۋدە دە باعىت، سوتتارعا دەگەن تالاپ وزگەرۋدە. ازاماتتار كەز كەلگەن ماسەلەسىمەن سوتقا بارىپ، سۇراقتارىن شەشە الۋى كەرەك»، - دەدى نۇرسۇلتان نازاربايەۆ.