وتاندىق كيىم ءوندىرىسىن جولعا قويۋ كەرەك - نۇرسۇلتان نازاربايەۆ

بۇل تۋرالى نۇرسۇلتان نازاربايەۆ اقوردادا وتاندىق ب ا ق وكىلدەرىمەن كەزدەسۋدە ايتتى، دەپ حابارلايدى قازاقپارات.

«ەلىمىزدە شيكىزاتتىق جانە قايتا وڭدەۋ يندۋسترياسى بولۋى قاجەت. بۇل، مەملەكەت تۇراقتىلىعىنىڭ كەپىلى، ءوزىمىزدى قامتاماسىز ەتۋ ءۇشىن كەرەك. ماسەلەن، ءبىز ەكونوميكانىڭ ماڭىزدى سالاسى بولىپ سانالاتىن جەڭىل ونەركاسىپتى ۇمىتتىق»، - دەدى پرەزيدەنت.

ول الماتىدا ساپالى كوستيۋم تىگەتىن فابريكا بار ەكەنىن ەسكە سالىپ، زاماناۋي ايەلدەر كيىمىن شىعارۋدى دا دامىتۋدى ۇسىندى.

«قالايدا، جەڭىل ونەركاسىبىمىزدى قالپىنا كەلتىرۋ كەرەك. وعان قاجەتتى ماقتا، ءجۇن، تەرىنىڭ بارلىعى تابىلادى. ساپالى جاقسى اياق كيىمدەر شىعاتىنىن دا بىلەمىن. ءبىزدىڭ اسكەرىمىز بەن پوليتسيا قازاقستان ونىمدەرىن كيىپ ءجۇر. (...) بۇل دۇرىس ساياسات، يندۋستريانى دامىتۋدى قولعا الامىز»، - دەپ اتاپ ءوتتى ن. نازاربايەۆ.

ايتا كەتەيىك، 2018-جىلدىڭ 5- قازانىندا ەلباسى قازاقستان حالقىنا ارنالعان كەزەكتى جولداۋىندا وتاندىق كاسىپورىندارعا حالىق كوپ تۇتىناتىن تاۋارلاردى شىعارۋعا كومەكتەسۋدى جۇكتەدى. وسى ورايدا پرەزيدەنت وڭدەۋ ونەركاسىبى مەن شيكىزاتتى ەمەس ەكسپورتتى قولداۋعا قوسىمشا 500 ميلليارد تەڭگە ءبولىپ بەرۋدى تاپسىردى. ال ۇلتتىق بانك ەكىنشى دەڭگەيلى بانكتەرگە 600 ميلليارد تەڭگە بولەتىن بولادى. ول اقشا وتاندىق ونىمدەردى شىعارۋ جوبالارىنا جۇمسالادى.