وزبەكستان مەن قازاقستان اراسىندا جاڭا قالا پايدا بولۋى مۇمكىن - ق ر پرەزيدەنتى

بۇل تۋرالى جىل قورىتىندىسى بويىنشا ەلىمىزدىڭ ب ا ق وكىلدەرىمەن كەزدەسۋ بارىسىندا ق ر پرەزيدەنتى نۇرسۇلتان نازاربايەۆ ءمالىم ەتتى، دەپ حابارلايدى قازاقپارات.

«شاۆكات ميرزيەيەۆ وزبەكستاننىڭ باسشىلىعىنا كەلگەننەن بەرى جاعداي مۇلدەم وزگەردى. ەل حالقىنىڭ سانى 33 ميلليوندى قۇرادى. بۇل، ءبىزدىڭ ارامىزداعى (ورتالىق ازياداعى) ەڭ ءىرى مەملەكەت بولىپ سانالادى. وسى ەلمەن قارىم-قاتىناستى تەرەڭدەتۋ ءبىز ءۇشىن قاجەت. كورشىمەن بايلانىستى نىعايتپاي قالاي ءومىر سۇرۋگە بولادى؟! ەكونوميكالىق تۇرعىدا پايدالى، الىسقا تاسىمالداۋدىڭ قاجەتى جوق. 1 ميلليارد ا ق ش دوللارعا جەتپەي جۇرگەن ساۋدا-ساتتىعىمىز بيىل 3 ميلليارد بولادى»، - دەدى ەلباسى.

وسى ورايدا مەملەكەت باسشىسى وزبەكستان رەسپۋبليكاسىنىڭ پرەزيدەنتىمەن تەلەفون ارقىلى سويلەسكەنىن ەسكە سالىپ، ەكى ەل اراسىنداعى ىنتىماقتاستىق ماسەلەلەرى تالقىلانعانىن اتاپ ءوتتى.

«بيىل ساۋدا كولەمى 42 پايىزعا ارتتى. ءبىز 5 ميلليارد ا ق ش دوللارىنا جەتكىزۋ ماقساتىن قويىپ وتىرمىز»، - دەدى ن. نازاربايەۆ.

پرەزيدەنتتىڭ سوزىنە قاراعاندا، ەكى ەل اراسىندا كوپتەگەن سالالارداعى ماسەلەلەر بويىنشا ۋاعدالاستىققا قول جەتكىزۋ ءۇشىن مۇمكىندىك پايدا بولدى. قازىرگى ۋاقىتتا بارلىق كولىك تۇرلەرىمەن ءوزارا ساپارلاۋ ءۇشىن ينفراقۇرىلىم جاسالىپ جاتىر.

«قازاقستان مەن قىتاي اراسىندا «قورعاس» اتتى ۇلكەن كەشەن سالىنىپ جاتقانىن بىلەسىزدەر. سونداي كەشەن وزبەكستان مەن قازاقستان اراسىندا دا بولادى دەپ سانايمىن. ەكى جاقتان ءوندىرىس جاساپ، ول جەردە جاڭا قالا پايدا بولۋى مۇمكىن»، - دەدى مەملەكەت باسشىسى.