ەلباسى جاڭا جىلدىق قايىرىمدىلىق كەشكە قاتىستى

نۇرسۇلتان نازاربايەۆ قايىرىمدىلىق كەشكە قاتىسۋشىلارعا ارناعان سوزىندە ءوتىپ بارا جاتقان جىل بۇكىل ەلىمىز ءۇشىن جەمىستى بولعانىن اتاپ ءوتتى.

- الەمدە ەلىمىزدىڭ بەدەلى ايتارلىقتاي نىعايا ءتۇستى. قازاقستانعا تارتىلعان ينۆەستيتسيا كولەمى 17,5 پايىزعا ارتتى. جالپى، ەكونوميكامىز 4 پايىزدان استام ءوستى. بۇل - بىرلەسە اتقارعان جۇمىسىمىزدىڭ ناتيجەسى. سوندىقتان، بارلىعىڭىزعا العىس ايتامىن، - دەدى قازاقستان پرەزيدەنتى.

سونىمەن قاتار، مەملەكەت باسشىسى الداعى جىلى ەلىمىزدى ودان ءارى دامىتۋعا سەپتىگىن تيگىزەتىن كوپتەگەن شارا وتەتىنىن ايتتى.

- 2019-جىلدان باستاپ ەڭ تومەنگى جالاقى 1,5 ەسە وسەدى. بۇل 1,3 ميلليون ادامدى قامتيتىن بولادى. بىلىكتىلىگىن راستاعان مۇعالىمدەردىڭ ەڭبەكاقىسى 30 پايىزدان 50 پايىزعا دەيىن كوبەيەدى. قۇقىق قورعاۋ ورگاندارىنىڭ قىزمەتىن جاقسارتۋ جونىندەگى جۇمىستار اتقارىلادى. تۋريزمدى ىلگەرىلەتۋ ءۇشىن دە شارالار قابىلدانادى، - دەدى ەلباسى.

نۇرسۇلتان نازاربايەۆ كەلەر جىلى جاستاردىڭ الەۋەتىن دامىتۋعا ەرەكشە ءمان بەرىلەتىنىن ايتتى.

- جاستارعا ارنالعان ارنايى مەملەكەتتىك باعدارلاما ءتورت مىندەتتى جۇزەگە اسىرۋعا باعىتتالادى. بۇل - ءبىلىم بەرۋ، باسپانامەن قامتاماسىز ەتۋ، دەنساۋلىق ساقتاۋ جانە پاتريوتتىق تاربيە بەرۋ ماسەلەلەرى. بۇگىنگى جۇمىستاردىڭ ءبارى بولاشاعىمىز ءۇشىن جاسالۋدا. جاستاردىڭ باستى ومىرلىك باعدارى ەلىمىزدىڭ تاۋەلسىزدىگى بولۋعا ءتيىس، - دەدى مەملەكەت باسشىسى.

سوڭىندا ەلباسى شاراعا قاتىسۋشىلاردى جاڭا جىلمەن تاعى دا قۇتتىقتاپ، بارشا قازاقستاندىقتارعا زور دەنساۋلىق، باق-بەرەكە مەن تابىس تىلەدى.

جاڭاجىلدىق كەشتى وتكىزۋدەن تۇسكەن قاراجات قايىرىمدىلىق ماقساتقا جۇمسالاتىن بولادى.