قوماقتى اقشاعا شەتەل ارتىستەرىن شاقىرمايمىز - مينيستر

 استانا. قازاقپارات - قازاقستان رەسپۋبليكاسىنىڭ مادەنيەت جانە سپورت ءمينيسترى ارىستانبەك مۇحامەدي ۇلى ەلگە كەلەتىن شەتەلدىك تانىمال ارتىستەردىڭ بيۋدجەت اقشاسىنىڭ ەسەبىنەن شاقىرىلمايتىنىن ايتتى، دەپ حابارلايدى قازاقپارات ءتىلشىسى.

«استانانىڭ 20 جىلدىق مەرەيتويى اياسىندا كوپتەگەن شارا وتكىزىلىپ، كوپشىلىكتىڭ ۇلكەن قىزىعۋشىلىعىن تۋدىردى. ءبىزدىڭ مينيسترلىكتىڭ باستى ساياساتى - ەڭ ءبىرىنشى كەزەكتە ءوز ونەرپازدارىمىزى تانىتۋ، كورسەتۋ. شەتەلدىك ارتىستەر تەك ءوزارا ءتيىمدى شارتتارعا ساي شاقىرىلادى. جاقىندا بىزدەن سوفيا روتارۋدى كىم شاقىرىپ جاتىر دەپ سۇرادى. بىزدە جوعارى دەڭگەيدەگى ارتىستەردى قازاقستاندا اسا قوماقتى اقشاعا شاقىرۋ ساياساتى جوق» ، - دەدى ارىستانبەك مۇحامەدي ۇلى قازاقستان رەسپۋبليكاسى ۇكىمەتىنىڭ باسپا ءسوز ورتالىعىندا وتكەن بريفينگ بارىسىندا.

 ءمينيستردىڭ ايتۋىنشا، شەتەل انشىلەرى دەمەۋشىلەردىڭ قاراجاتى ەسەبىنەن عانا شاقىرىلادى.

«ءبىز ەكسپو-2017 كورمەسى اياسىندا La Scala تەاترىنىڭ ارتىستەرىن شاقىردىق. ءبىراق ول كەزدە 260 ادام «ەني» كومپانيا توبىنىڭ ارقاسىندا كەلدى. پلاسيدو دومينگو Rolex ماركالى ساعات كومپانياسىنىڭ ارقاسىندا ونەر كورسەتتى» ، - دەدى ول.