قازاق كۇرەسىنەن جۇلدىزدار اراسىندا «ونەر بارىسى» تۋرنيرى وتەدى
مۇنداي اۋقىمدى شارا ناۋرىز ايىندا استانا قالاسىندا وتكىزىلەدى. بۇل تۋرالى بەلگىلى اقىن بالعىنبەك يماشەۆ الەۋمەتتىك جەلى ارقىلى حابارلادى.
«ءسۇيىنشى حابار! بىلەك پەن جۇرەك بىرىگەتىن «ونەر بارىسى» دەگەن جوبانى قولعا الىپ وتىرمىز. تانىمال انشىلەر، اقىندار، جايدارمانشىلار، اكتەرلەر جانە ت. ب ونەر يەلەرى قازاق كۇرەسىنەن باق سىنايتىن بولادى»، - دەلىنگەن ايتىسكەردىڭ «ينستاگرام» پاراقشاسىندا.
ايتا كەتەيىك، «ونەر بارىسى» بىلتىر ءبىرىنشى رەت قوستاناي وبلىسىندا وتكەن-ءدى. وبلىستىق مادەنيەت باسقارماسىنىڭ باسشىسى ەرلان قالماقوۆتىڭ سوزىنشە، مۇنداي شارانىڭ باسقا وڭىرلەردە جالعاسۋى قازاق كۇرەسىنىڭ بۇقارالىق سيپات الۋىنا سەپتىگىن تيگىزەدى.
«بۇل جوباعا وبلىستىق قازاق دراما تەاترىنىڭ ءارتىسى تولەندى ءالقوجا باستاماشى بولدى. مادەنيەت باسقارماسى ءارتىستىڭ بۇل ۇسىنىسىن قولدادى. 1-2 اي دايىندالىپ، مادەنيەت جانە ونەر قىزمەتكەرلەرىنىڭ كۇنىنە ورايلاستىرىپ وتكىزدىك. وسىنداي اۋقىمدى جارىستىڭ باسقا وڭىرلەردە، اسىرەسە استانادا وتەتىنىنە قۋانىشتىمىز. بۇل «ونەر بارىسىنىڭ» جاڭا دەڭگەيدە شىققانى دەپ بىلەمىز. ەڭ باستىسى، اتالعان تۋرنير «رۋحاني جاڭعىرۋ» باعدارلاماسىمەن مازمۇنداس»، - دەيدى باسقارما باسشىسى.
بىلتىرعى تۋرنيرگە 20-40 جاس ارالىعىنداعى وتىزدان استام اۋەسقوي سپورتشى قاتىستى. يدەيا اۆتورى تولەندى ءالقوجا ايتقانداي، «جاستار جىلىندا» ونەر يەلەرىنىڭ اراسىنداعى سپورت جارىستارىنا كوپتەپ كوڭىل بولىنەدى.
«ءبىزدىڭ بىلتىرعى تۋرنيردە ەشكىم جۇلدە ءۇشىن تالاسقان جوق. جارىسقا كەلگەندەردەن تۇسكەن قارجى جانكەلدين اۋدانىنىڭ ورتالىعىندا تۇراتىن سەگىز جاسار اقەركە جەكسەنبايعا كوپ فۋنكتسيالى ەستۋ اپپاراتىن ساتىپ الۋعا جۇمسالدى. قايىرىمدىلىق ماقساتتا وتكىزسەك تە، جەڭىمپازعا سىياقى تاعايىندادىق. ايتا كەتەرلىگى، ەلوردادا وتكەلى وتىرعان جارىسقا قوستانايدىڭ «ونەر بارىسىن» قاتىستىرساق، جارىستىڭ اۋقىمى ودان سايىن كەڭەيەدى»، - دەدى ت. ءالقوجا اگەنتتىك تىلشىسىنە بەرگەن سۇحباتىندا.