كومەديا جانرىنداعى «افريكاداعى قازاقشا بيزنەس» فيلمى جارىققا شىقتى
پروديۋسەر نۇرلان قويانبايەۆ پەن رەجيسسەر انۆار ماتجانوۆ تۇسىرگەن فيلمنىڭ العاشقى كورسەتىلىمى الماتىدا ءوتتى. بۇل فيلم بۇعان دەيىنگى «قازاقشا بيزنەستىڭ» جالعاسى ىسپەتتەس. اتى ايتىپ تۇرعانداي، بۇل جولى نەگىزگى ءتۇسىرۋ كەزەڭى بىرىككەن اراب امىرلىكتەرى مەن افريكا قۇرلىعىندا وتكەن. ال اكتەرلەر قۇرامىندا جانە كينو مازمۇنىندا ۇلكەن وزگەرىس جوق. فيلم پروديۋسەرى نۇرلان قويانبايەۆ كورەرمەندەردى كۇلكىگە كەنەلتىپ، العىسىن الۋ ءۇشىن ايانىپ قالمادىق دەيدى.
نۇرلان قويانبايەۆ، فيلم پروديۋسەرى:
- قىرعىزستان بولسىن، وزبەكستان بولسىن، رەسەيدە بولسىن ءتۇسىرۋ قيىن. ويتكەنى باسقا ەل عوي. ال افريكا جالپى باسقا قۇرلىق. مەنتاليتەتى بولەك جانە ءتىل جاعىنان بىزدە ەرەكشەلىگىمىز وتە كوپ. سوعان قاراماستان، ءبىز تىرىستىق. كورەرمەن ءۇشىن ءبىر ەرەكشە ءبىر دۇنيە تۇسىرەيىك دەپ. وسى افريكا ەلىندەگى پروداكشن كومپانياعا العىسىمدى بىلدىرگىم كەلەدى. ويتكەنى ول كىسىلەر كاسىبي تۇردە وتە جاقسى دەڭگەيدە كومەكتەستى.
فيلمنىڭ جالپى تۇجىرىمداماسى - كورەرمەندەردى كۇلدىرە وتىرىپ، تۋىستىق قارىم- قاتىناس ارقىلى كوپشىلىكتى بىرلىككە باۋىرمالدىققا شاقىرۋ. كەنيا مەملەكەتىنىڭ استاناسى نايروبي قالاسىنداعى ءتۇسىرۋ الاڭىندا اكتەرلەر كوپتەگەن قىزىقتاردىڭ جانە قيىندىقتاردىڭ بولعانىن ايتادى.
قاجەت سماعۇل، باقداۋلەت رولىندە:
- ەڭ باستىسى، جالپى افريكاعا بارىپ «ىستىق بولادى- اۋ» دەپ كادىمگىدەي جەڭىل كيىمدەر كيىپ الىپ بارعان ەدىك. سويتسەك، تامىز ايى ول جاقتا قىس ەكەن. كادىمگىدەي سۋىق بولىپ، توڭعانىمىز ەڭ قىزىعى سول بولدى. افريكاعا بارىپ توڭعانىمىز قىزىق بولدى بارىنەن دە.
«Kinopark 11 Imax Esentai» كينوتەاترىندا وتكەن فيلمنىڭ العاشقى كورسەتىلۋىنە كوپتەگەن ونەر ادامدارى كەلدى. 27 - جەلتوقساننان باستاپ «افريكاداعى قازاقشا بيزنەس » فيلمى ەلىمىزدىڭ بارلىق كينوتەترلارىندا كورسەتىلە باستايدى.
اۆتورلارى: جاندوس ايتباي ۇلى، ەدۋارد كون
www.24.kz