مەيرامبەك بەسبايەۆ: اتاق ءۇشىن قىرىلىسقان تالاي كوكەلەرىمىزدى كوردىك

 استانا. قازاقپارات - مەيرامبەك بەسبايەۆ ونەردەگى قارىنداسى ءمولدىر اۋەلبەكوۆانىڭ «قۇرمەت» وردەنىن العانىنا قۋانىشتى. ونىڭ پىكىرىنشە، ءمولدىر بۇل ماراپاتقا ابدەن لايىق.

 بەسبايەۆتىڭ ايتۋىنشا، بۇرىندارى ارتىستەرگە كەلگەندە ايانىپ قالاتىن ۇكىمەت بۇگىندە سىي- سىياپاتتى ايامايدى. بۇل قۋانىشتى جايت، دەيدى ونەر يەسى.

بۇل تۋرالى 31 - ارنانىڭ «ايتا بەرسىن» باعدارلاماسىنا سىلتەپ حابارلايدى.

«بۇرىنعى زاماندا ولەيىن دەپ جاتقاندا نە بولماسا ولگەننەن كەيىن بەرەتىن بۇل اتاقتى. ءبىراق قۇدايعا شۇكىر، قازىر ءوزىمىزدىڭ مەملەكەتىمىز بار. وزىمىزدە شىعىپ جاتقان التىن قىزدارعا نەگە قيمايمىز سونى؟ نەگە بەرمەسكە؟ ەڭبەگى بار، ەل الدىندا ءجۇر، نە بولسا سونى ايتىپ جاتقان جوق. سوندىقتان ابدەن بولادى. ارىپتەستەر ءۇشىن دە، ونەر ادامدارى ءۇشىن دە بۇل قۇرمەت. ۇكىمەت باعالاپ جاتسا... ال كەيىن قارتايعاننان كەيىن بۇنىڭ كەرەگى دە جوق»، - دەيدى مەيرامبەك.

بەسبايەۆ ءبىر كەزدەرى اتاق پەن وردەنگە تالاسقان تالاي ونەرپازداردى كورگەن.

«تالاي- تالاي وسى اتاق ءۇشىن قىرىلىسقان دا كوكەلەرىمىزدى كوردىك، ءبىر- ءبىرىنىڭ جولىن كەسىپ كەتكەن ادامداردى دا، وكپەلى ادامداردى دا كوردىك. سوندا اتتەگەن- اي، نە بولدى سونشا، ءبىزدىڭ ۇكىمەت قيمادى ما ەكەن دەگەن دە ويلار بولدى. ءبىراق ارينە، اتاق ءۇشىن جۇمىس ىستەمەيسىڭ عوي. ەلىڭ ءۇشىن ەڭبەك ەتەسىڭ. ءبىراق ۇكىمەتتەن ەلەنگەن كەزدە تاعى دا ءبىر جاۋاپكەرشىلىك بولاتىن سياقتى. مەن وسىعان لايىقتىمىن با، جوق پا دەگەن سياقتى. ول ادام ءتۇزۋ جۇرۋگە، ايىلىن تارتىپ جۇرۋگە، ءتارتىپتى جۇرۋگە تىرىسادى. سوندىقتان وتە قۋانىشتىمىن. ءبىرتالاي ونەرپازداردى قۇرمەتتەپ، جىل سايىن ماراپاتتاپ جاتادى. ەڭبەكتەرى ەلەنە بەرسىن»، - دەيدى مەيرامبەك.