تۇركىستان ورتا ازيالىق ستيلدەگى قالاعا اينالادى

 بۇل تۋرالى تۇركىستان وبلىسىنىڭ وڭىرلىك كوممۋنيكاتسيالار قىزمەتىندە وتكەن بريفينگتە قالا اكىمى الىپبەك وسەربايەۆ ايتتى، دەپ حابارلايدى قازاقپارات ءتىلشىسى.

 شاھاردىڭ بولاشاق كەلبەتى تۋرالى دا بايانداعان الىپبەك وسەربايەۆ ءۇش باعىتتى دا اتاپ كەتتى. ونىڭ سوزىنشە، ءبىرىنشى باعىت «تاريحي ايماق» دەپ اتالادى. وعان سايكەس، قوجا احمەت ياساۋي كەسەنەسى ورنالاسقان تاريحي ايماقتاعى 88,7 گەكتار جەرگە ورنالاسقان 18 نىساندى رەستاۆراتسيالاۋ كوزدەلگەن. ال، «ەكىنشى باعىت رۋحاني- مادەني ورتالىق» ايماعى 98 گەكتار جەرگە جوسپارلانىپ وتىر. ءۇشىنشىسى اكىمشىلىك- ىسكەرلىك ورتالىعىنىڭ ايماعى 700 گەكتاردى قۇرايدى. وندا وبلىستىق اكىمدىك عيماراتىنان باستاپ، باسقارمالار مەن دەپارتامەنتتەر عيماراتى، مەديا ورتالىق، ساۋدا ورتالىقتارى مەن تۇرعىن ءۇي كەشەندەرى، جاستار مەن وقۋشىلار سارايى، سپورت، مادەني كەشەندەردىڭ قۇرىلىسى تۇسەدى دەپ كۇتىلۋدە. شاھار باسشىسى سونداي- اق، قالانىڭ الەۋمەتتىك- ەكونوميكالىق جاعىنا دا توقتالىپ كەتتى.

اكىمنىڭ مالىمەتىنشە، قالا حالقىنىڭ 94,1 پايىزى تازا اۋىز سۋمەن قامتاماسىز ەتىلگەن. ال، ساپالى ەلەكتر ەنەرگياسىمەن قامتۋ كورسەتكىشى 99,8 پايىزعا جەتكەن. قازىرگى تاڭدا، كوممۋنالدىق قىزمەتپەن تولىق قامتۋ ماقساتىندا ءتيىستى جۇمىستار اتقارىلۋدا.

 «تۇركىستان قالاسىنداعى جالپى ىشكى ءونىم حالىقتىڭ جان باسىنا شاققاندا 412, 6 مىڭ تەڭگەگە جەتكەن. وتكەن جىلى بۇل كورسەتكىش 411,2 مىڭ تەڭگەنى قۇراعان. ونەركاسىپ جانە كاسىپكەرلىك سالاسىندا 35 كاسىپورىن جۇمىس ىستەيدى. ەسەپتى كەزەڭدە جالپى ونەركاسىپ ءونىم كولەمى 11 ميلليارد 309 ميلليون تەڭگەنى قۇراپ، وتكەن جىلدىڭ ءتيىستى كەزەڭىمەن سالىستىرعاندا ءوسىم 106 پايىزدى قۇراعان. ۇدەمەلى يندۋستريالدى - يننوۆاتسيالىق دامۋ باعدارلاماسى اياسىندا 2010-2017 -جىلدارى جالپى قۇنى 2 ميلليارد 214 ميلليون تەڭگەنى قۇرايتىن 10 جوبا ىسكە قوسىلىپ، 539 جۇمىس ورنى اشىلدى. وندىرىلگەن ءونىم كولەمى 1 767,2 ميلليون تەڭگەنى قۇراپ وتىر»، - دەدى الىپبەك وسەربايەۆ.

اۆتور: اينۇر اقبايەۆا