مەيرامبەك بەسبايەۆ روزا رىمبايەۆانىڭ وزىنە قاتىستى ايتقان پىكىرىنە جاۋاپ بەردى

 استانا. قازاقپارات - قازاق حالقىنىڭ سۇيىكتى ۇلى مەيرامبەك بەسبايەۆقا «داۋسى جوق» دەپ باعا بەرگەنى ءۇشىن حالىق ءارتيسى روزا رىمبايەۆانىڭ باسى داۋعا قالدى.

كوپتەگەن تىڭدارماندار سۇحباتتىڭ تولىق نۇسقاسىن كورىپ ۇلگەرمەستەن، روزا قۋانىش قىزىن جەردەن الىپ، جەرگە سالعان. بۇل رەتتە مەيرامبەك بەسبايەۆ ونەردەگى اپكەسىن جاقتاپ، وعان ءتىل تيگىزبەۋدى ءوتىندى.

«ارداقتى دوستار، الىپ-قاشپا سوزگە ەرمەي، الاۋىزدىق تۋدىرماي ءالىپتىڭ ارتىن باققانىمىز ءجون. مەنىڭ باعامدى كوتەرەم دەپ، مەنىڭ اپكەم - قازاقتىڭ ءبىرتۋار قىزى روزا رىمبايەۆانىڭ بەدەلىنە نۇقسان، ابىرويىنا ءتىل تيگىزبەيىك!» - دەپ پىكىرىن ءبىلدىردى ول Instagram-داعى پاراقشاسىندا.

ايتا كەتەيىك، تيمۋر بالىمبەتوۆكە بەرگەن سۇحباتىندا روزا قۋانىش قىزى مەيرامبەكتىڭ اسقان داۋسى بولماسا دا، ونى بۇكىل حالىق جاقسى كورەتىنىن، ءوزى دە جاقسى كورىپ تىڭدايتىنىن ايتقان بولاتىن.

 

Stan.kz