مەيرامبەك بەسپايەۆ تۇسكەن تەلەحيكايانى «حابار» ارناسى كورسەتەدى
قاڭتار ايىنان باستاپ كورسەتىلەتىن كومەديا «كەلىنجان» دەپ اتالادى، دەپ حابارلايدى قازاقپارات.
كارتينانىڭ وقيعا جەلىسى بويىنشا كۇلىمحان اپانىڭ ءۇش ۇل، ءبىر قىزى بار. ۇلداردىڭ كەنجەسى ۇيگە كەلىن الىپ كەلەدى. قالادا وسكەن اسىلىم ەسىمدى ارۋ اۋىل ومىرىنە ۇيرەنىپ، ەنەسىنە ۇناعىسى كەلەدى. الايدا كۇلىمحان اپايدىڭ مىنەزى اۋىر، مۇنى اۋىلداعى ءار ادام بىلەدى. سوندىقتان بولار وعان ەشكىم جاقپايدى، كەلىندەرىنىڭ ءبىرى دە قاتال ەنەنىڭ كوڭىلىنەن شىقپايدى. سونداي كۇندەردىڭ بىرىندە كۇلىمحان اپانىڭ ءوز قىزى تۇرمىسقا شىعادى. قىزى وزگە ءۇيدىڭ ءتۇتىنىن تۇتەتىپ، كەلىن اتانعان كەزدە قاتال ەنەنىڭ كوزقاراسى وزگەرە باستايدى.
«ءبىز كەلىننىڭ وبرازى ارقىلى ەنەنىڭ مارتەبەسىن كورسەتۋ نەمەسە ەنەنىڭ كەلىنگە قاتتى بولۋى ارقىلى كەلىننىڭ ەز بولىپ جۇرگەنىن كورسەتۋدى ماقسات ەتپەدىك. بۇل جەردە ءارقايسىسىنىڭ ءوز ءرولى، سەبەبى بار. ەنەنىڭ سونداي بولۋىنا نە اسەر ەتتى، نەگە ءبىزدىڭ ەنەلەرىمىز قاتال، نەگە ءبىزدىڭ كەلىندەرىمىز سونداي دەگەن سۇراقتارعا جاۋاپ بەرەمىز. كەلىسپەيتىندەردە بولۋى مۇمكىن، ءبىراق ءار ادام ءوزىن كورەدى. مەن وعان سەنىمدىمىن، ويتكەنى مەن كۇندەلىكتى كورىپ جۇرگەن دۇنيەلەردى جازدىم»، - دەيدى كارتينانىڭ پروديۋسەرى گۇلنۇر ماماساريپوۆا.
تەلەسەريالدا بەلگىلى اكتەرلەرمەن قاتار جاس، اكتەرلىك جولدى ەندى عانا باستاعاندار بار. كۇلىمحان اپانىڭ ءرولىن - لەيلو بەكنازار حانينگا وينايدى. پروديۋسەردىڭ ايتۋىنشا ءدال وسى كەيىپكەردى ۇزاق ىزدەگەن، الايدا ءوزى تانيتىن، بۇعان دەيىن جۇمىس ىستەگەن اكتريسانى تاڭداپتى. ەستەرىڭىزدە بولسا، لەيلو بەكنازار حانينگا بۇعان دەيىن «حابار» تەلەارناسىندا كورسەتىلگەن «انا جۇرەگى» تەلەسەريالىندا باستى ءرولدى سومداعان ەدى.
«كۇلىمحان - مەنىڭ كەيىپكەرىم، ءاربىر اۋىلدا بولاتىن انا، ەنە. قازاقتىڭ وزىندىك داستۇرلەرى بار، بۇل انا مەن بالا اراسىنداعى، ۇلكەندى سىيلاۋ، كىشىنى قۇرمەتتەۋ، ەنە مەن كەلىن اراسىنداعى قازاقى داستۇرلەر، سونىڭ بارلىعى وسى جەردە كورىنەدى. قازاقتا كەلىن السا ونى ءۇي قىزمەتشىسى ەتىپ سالىپ قويادى دەپ ايتىپ جاتادى، ءبىراق ءبىز (ەنەلەر) مۇنى ول جامان بولسىن دەپ ايتپايمىز عوي. ەنە ەشقاشان ءوز بالاسى الىپ كەلگەن كەلىن جامان بولسىن دەپ ويلامايدى، ونى ءوز قىزىنداي باۋىرىنا باسادى، ءبىراق ءار جانۇيانىڭ ءوز ءداستۇرى بار، سوعان اقىرىنداپ ۇيرەتۋ كەرەك. سول وتباسىعا تارتۋ كەرەك، سول جاعىنان قىزىقتى بولادى دەپ ويلايمىن»، - دەيدى لەيلو بەكنازار حانينگا ءوز وبرازى جايلى.
سونىمەن قاتار كارتينادان رۇستەم جانامانوۆ، نازار سۇلتانبايەۆ، داريعا بادىقوۆا، نۇرگۇل مىڭبايەۆا، داۋلەت وسەربايەۆ، سارا امانگەلدى سىندى اكتەرلەردى دە كورەسىزدەر.
«بىزدە ءۇش ابىسىن بار. ابىسىننىڭ ۇلكەنىن داريعا بادىقوۆا وينايدى. داريعانىڭ ءوز امپۋلاسى بار، كورەرمەنگە جاقسى تانىس اكتريسا. ورتانشى ابىسىن نۇرگۇل مىڭبايەۆا. ونىڭ بۇعان دەيىنگى جۇمىستارىن قاراپ شىقتىق. ال كىشكەنتاي كەلىن، قالادا وسكەن قىزدى سارا امانگەلدى وينايدى. شاڭىراقتاعى ءۇش ۇلدىڭ ۇلكەنىن رۇستەم جانامانوۆ، ورتانشى ۇلدى نازار سۇلتانبايەۆ وينايدى. نازار بۇعان دەيىن قاراساي باتىردى وينادى. ەكى سەريال ەكى ءتۇرلى، بۇل ءبىر قىزىق بولايىن دەپ تۇر. كىشكەنتاي ۇلدى، دەبيۋتانت، ەرەجەسىز جەكپە-جەكتەن الەم چەمپيونى داۋلەت وسەربايەۆ سومدايدى»، - دەيدى گۇلنۇر ماماساريپوۆا.
تاعى سەريالدىڭ ءبىر ەپيزودىندا مەيرامبەك بەسپايەۆت اۋىل مۋزىكانتى رەتىندە وينايدى. جالپى فيلم قاراپايىم قازاقستاندىقتاردىڭ كەز كەلگەنىنە تانىس، قىزىقتى، جىلى بولادى دەيدى شىعارماشىلىق توپ. ال، ەنە مەن كەلىندەر اراسىنداعى وقيعالاردىڭ قالاي اياقتالارىن قاڭتار ايىندا «حابار» تەلەارناسىنان تاماشالاڭىزدار.