پۋتين: يادرولىق سوعىس قاۋپىن ەسكەرمەۋگە بولمايدى

ماسكەۋدە ءوتىپ جاتقان ءداستۇرلى باسپا ءسوز كونفەرەنسياسىندا پۋتين باتىس ەلدەرى مەن رەسەي قارىم-قاتىناسىندا شيەلەنىستى كۇشەيتۋدەن ورتاق جاۋاپكەرشىلىك ارقالاۋ سەزىمى باسىم تۇسەدى دەپ ۇمىتتەنەتىنىن ايتتى.

مەملەكەتتىك تەلەارنا جۋرناليسىنىڭ سۇراعىنا جاۋاپ بەرگەن پۋتين يادرولىق سوعىس قاتەرىن جەتە باعالاماۋ تەندەنتسياسى بايقالاتىنىن ايتىپ، مۇنداي سوعىستىڭ «بارلىق وركەنيەتتى جوياتىنىن» ەسكەرتتى.

رەسەي پرەزيدەنتى ا ق ش- تىڭ 2002-جىلدىڭ باسىندا بالليستيكالىق زىمىرانداردى جويۋ تۋرالى كەلىسىمنەن شىعۋى ماسكەۋ مەن ۆاشينگتون اراسىنداعى «ستراتەگيالىق تەپە-تەڭدىككە» نۇقسان كەلتىرگەنىن ايتتى. ونىڭ سوزىنشە، ا ق ش- تىڭ ورتا جانە قىسقا قاشىقتىققا ۇشاتىن زىمىرانداردى جويۋ تۋرالى كەلىسىمنەن شىعۋ نيەتى بۇل تەپە-تەڭدىكتى ودان ارى بۇزادى. پۋتين ا ق ش پەن رەسەي كەلىسىمنىڭ ورىندالۋىنا قاتىستى جاڭا كەلىسسوز باستاماعانى دۇرىس ەمەسىن جەتكىزدى.

شاعىن جانە ورتا قاشىقتىققا ۇشاتىن زىمىرانداردى جويۋ تۋرالى كەلىسىم كۇشى 2021-جىلى توقتايدى، ءبىراق ەكى ەل ماقۇلداعان جاعدايدا تاعى بەس جىلعا ۇزارتىلادى.

بيىل قازان ايىندا ا ق ش پرەزيدەنتى دونالد ترامپ ا ق ش رەسەيمەن ورتا جانە قىسقا قاشىقتىققا ۇشاتىن زىمىرانداردى جويۋ جونىندەگى كەلىسىمنەن شىعۋعا نيەتتى ەكەنىن مالىمدەگەن. ۆاشينگتون بۇعان رەسەيدىڭ اتالعان كەلىسىمدى بۇزىپ، ەۋروپاعا يادرولىق وقتۇمسىق جەتكىزە الاتىن راديۋسى شاعىن زىمىراندار ورناتۋى سەبەپ دەگەن. رەسەي بۇل ايىپتاۋدى تەرىسكە شىعارىپ، ۆاشينگتونعا جاۋاپ رەتىندە «اسكەري-تەحنيكالىق تۇرعىدان ءتيىستى شارا قولداناتىنىن» مالىمدەگەن.

ا ق ش پەن س س س ر اراسىندا ورتا جانە قىسقا قاشىقتىققا ۇشاتىن يادرولىق زىمىرانداردى جويۋ تۋرالى 1987-جىلى جاسالعان كەلىسىم ا ق ش پەن رەسەيگە راديۋسى 300 دەن 3400 ميل قاشىقتىققا دەيىن جەردەن ۇشاتىن بالليستيكالىق جانە قاناتتى زىمىرانداردى شىعارۋعا، سىناقتان وتكىزۋگە جانە ساقتاۋعا تىيىم سالادى.

«ازاتتىق»