ولجاس سۇلەيمەنوۆ استانا سوتىنان نەمەرەسىنىڭ ولىمىنە كىنالى قىزدى كەشىرۋدى سۇرادى

ولجاس سۇلەيمەنوۆتىڭ قولى قويىلىپ، استانا سوتىنا جىبەرىلگەن حات NUR. KZ رەداكسياسىنا دا كەلىپ ءتۇستى. وندا ماليكا مۇحيتوۆا سۇلەيمەنوۆتەردىڭ قايعىسىن انا بولعاندا تۇسىنەتىنى جازىلعان.

«ەسكەندىر سۇلەيمەنوۆتىڭ ولىمىنەن كەيىن التى اي ءوتتى. ونىڭ جاقىندارىن ەشقانداي دا ۋاقىت ەمدەمەيدى. مەنىڭ نەمەرەم باعدارشامدا جاسىل ءتۇس جانعاندا كەتىپ بارا جاتقان موتوتسيكل جولىن توقتاتقان كولىك جۇرگىزۋشىسىنىڭ قۇربانىنا اينالدى»، - دەپ جازىلعان حاتتا.

سۇلەيمەنوۆ بۇل فاكتىنى بىرنەشە اي بويى جۇرگىزىلگەن تەرگەۋ جۇمىستارى دا انىقتاعانىن جازعان. ال اۋداندىق سوت قاجەتتى شەشىم قابىلداعان.

«2018-جىلدىڭ 26- جەلتوقسان كۇنى استانا قالالىق سوتى دا وسى ءىستى قارايدى. سۇلەيمەنوۆتەر جانۇياسىنىڭ ۇلكەنى رەتىندە مەن بار جاۋاپكەرشىلىكتى ءوز موينىما الىپ، جوعارعى سوتتان جول اپاتىنا كىنالى قىزعا جازا قولدانۋدى، الايدا باس بوستاندىعىنان ايىرماۋدى سۇرايمىن.

ونىڭ جاسى 30 عا تاياپ قالعان. تۇرمىسقا شىعىپ، دۇنيەگە بالا اكەلسىن. سوندا ماليكا مۇحيتوۆا ءبىزدىڭ قاسىرەتىمىزدى تۇسىنەتىن بولادى»، - دەگەن ول حاتتا.

ايتا كەتەيىك، قايعىلى وقيعا استانا قالاسىندا 22- ماۋسىم كۇنى بولعان. «Hyundai» اۆتوكولىگىن باسقارعان ماليكا مۇحيتوۆا جازۋشى ولجاس سۇلەيمەنوۆتىڭ نەمەرەسى ەسكەندىر سۇلەيمەنوۆ وتىرعان موتوسيكلمەن سوقتىعىسقان.

ناتيجەسىندە ازامات وقيعا ورنىندا كوز جۇمىپ، ماليكا مۇحيتوۆاعا قارسى قىلمىستىق ءىس قوزعالعان ەدى.

ال قاراشا ايىندا كىنالى دەپ تانىلعان ازاماتشا ەكى جىلعا باس بوستاندىعىنان، بەس جىلعا اۆتوكولىك جۇرگىزۋ كۋالىگىنەن ايىرىلدى.