اقتوبەدە ديماش قۇدايبەرگەن بەينەلەنگەن كارتينا ساتىلىمعا قويىلدى

اقتوبە. قازاقپارات - اقتوبەلىك كاسىپكەرلەر قايىرىمدىلىق بالىن وتكىزدى. اۋكتسيون كەزىندە ءانشى ديماش قۇدايبەرگەننىڭ پورترەتى ساتىلىمعا شىعارىلدى، دەپ حابارلايدى قازاقپارات ءتىلشىسى.

اقتوبە وبلىسىنىڭ كاسىپكەرلەرى بۇگىن ۇلكەن قايىرىمدىلىق بالىن وتكىزىپ، مۇمكىندىگى شەكتەۋلى جاندار مەن ولاردىڭ اتا-انالارىنا ارنايى سەرتيفيكات تابىس ەتتى. شارا «اتامەكەن» كاسىپكەرلەر پالاتاسىنداعى ىسكەر ايەلدەر كەڭەسىنىڭ باستاماسىمەن جانە اقتوبە قالاسى اكىمدىگىنىڭ قولداۋىمەن ۇيىمداستىرىلدى.

قايىرىمدىلىق كەشكە مەملەكەتتىك ورگانداردىڭ، بيزنەستىڭ، ۇكىمەتتىك ەمەس ۇيىم وكىلدەرى مەن دەپۋتاتتار شاقىرىلدى. اقتوبە وبلىسىنىڭ اكىمى بەردىبەك ساپاربايەۆ پەن ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى اليك شپەكبايەۆ تا قاتىستى.

«كومەك بەرۋ، قولداۋ كورسەتۋ قازاققا ءتان قاسيەت. ءبىزدىڭ وسى ەرەكشەلىگىمىز كوپكە ۇلگى. وزگە ۇلت وكىلدەرى دە قازاقتىڭ قايىرىمدى ىستەرىن ۇلگى ەتىپ، سىيلايدى. اقتوبە كاسىپكەرلەرىنە العىس ايتامىز. بۇل كەش جاڭا جىل مەرەكەسى قارساڭىندا ۇيىمداستىرىلىپ، ادامدارعا ەرەكشە كوڭىل- كۇي سىيلايتىنىنا سەنىمدىمىز»، - دەدى وبلىس اكىمى بەردىبەك ساپاربايەۆ.

ايتا كەتەيىك، قايىرىمدىلىق بال كەزىندە بەس وتباسىنىڭ ءارقايسىسىنا 500 مىڭ تەڭگەنىڭ سەرتيفيكاتى تاپسىرىلدى. ءبىرىنشى سەرتيفيكات 1- توپ مۇگەدەگى سەرگەي وستروۆسكيگە بەرىلدى. ول «دامۋ-كومەك» باعدارلاماسى ارقىلى كومپيۋتەر مەن كەڭسە جيھازدارىن الىپ، زاعيپ جانە كورۋ قابىلەتى ناشار ادامداردى كومپيۋتەرلىك ساۋاتتىلىققا ۇيرەتۋ كلاسىن اشتى. قازىرگى كەزدە كاسىپكەر تۇراقتى عيمارات تاپپاي، ءوز جاردەماقىسىن كەڭسە جالداۋعا تولەپ وتىر. الداعى ۋاقىتتا وڭىرلىك كاسىپكەرلەر پالاتاسىنداعى ىسكەر ايەلدەر كەڭەسى سەرگەي وستروۆسكيدىڭ مەملەكەتتىك ساتىپ الۋلار مەن كونكۋرستارعا قاتىسۋى ءۇشىن قۇقىقتىق مارتەبە الۋعا، قوعامدىق بىرلەستىك قۇرۋىنا قولداۋ جاساماق.

ەكىنشىسى - 26 جاستاعى امىرشە ورىنباساروۆ. Ⅱ توپ مۇگەدەگى كاسىپكەرلىك نەگىزدەرى بويىنشا ءبىلىم الىپ، ەر ادامدارعا ارنالعان شاشتاراز اشۋ بيزنەس-جوباسىن قورعاپ شىقتى. ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ باعدارلاماسى ارقىلى 240 مىڭ تەڭگە كولەمىندە قايتارىمسىز گرانت ۇتىپ الدى. بۇگىن بەرىلگەن قارجى قوسىمشا جابدىقتار ساتىپ الۋعا جانە كەڭسەنى جالعا الۋ ءۇشىن جۇمسالادى.

ءۇشىنشىسى - ءىزمۇرات سۇگىرتايەۆ. 1- توپ مۇگەدەگى جولاۋشىلار تاسىمالىمەن اينالىسىپ، قۇرىلىس جۇمىستارىن جۇرگىزۋگە، پاتەر جوندەۋگە مۇمكىندىك الدى.

ءتورتىنشىسى - ەسەت جانە بەكەت اتتى تۋا ءبىتتى سال اۋرۋنا شالدىققان ەكى بالانىڭ اناسى جاننا كالينا. ول ۇيىندە وتىرىپ تورت، كونديتەلىك بۇيىمدار پىسىرەدى. قارجى بالالاردىڭ مۇگەدەكتىك ارباسىن جاڭارتۋعا قاجەت بولدى.

بەسىنشىسى - گۇلنۇر دوسمۇحامبەتوۆا. قارجى اق قان اۋرۋىنا شالدىققان ءتورت جاستاعى اقجان اكىمعاليدىڭ ەمىنە جۇمسالادى.

قايىرىمدىلىق بالى كەزىندە كىرۋ بيلەتتەرى ساتىلىپ، ءتۇرلى كارتينالار، اسپازدىق ستۋديالارى مەن اسەمدىك سالوندارىنىڭ، كيىم دۇكەندەرىنىڭ جانە كوسمەتيكا بۇيىمدارى ورتالىقتارىنىڭ سەرتيفيكاتتارى اۋكتسيونعا قويىلدى. ەڭ قىمباتى ءانشى ديماش قۇدايبەرگەننىڭ كارتيناسى بولدى. كارتينا باعاسى 100 مىڭ تەڭگەدەن باستالىپ، 200 مىڭ تەڭگەگە جەتتى. اقتوبەلىك كاسىپكەر، دەپۋتات اسحات ايتجانوۆ ساتىپ الىپ، ءوز لەبىزىن ءبىلدىردى.

«ديماش قۇدايبەرگەن قازاقتىڭ اتىن الەمگە تانىتىپ جۇرگەن ءانشى ءارى جەرلەسىمىز. ال اناسى سۆەتا ايتبايەۆا ءبىزدىڭ ارىپتەسىمىز. قازاقتىڭ بالالارى وسىنداي بولسىن»، - دەدى كاسىپكەر.

ديماش قۇدايبەرگەننىڭ «دالا جۇلدىزى» اتتى كارتيناسىن اقتوبەلىك سۋرەتشى ايدار ەسپايەۆ مايلى بوياۋمەن سالعان.

ايتا كەتەيىك، شارا ق ر ۇلتتىق كاسىپكەرلەر پالاتاسىنىڭ باستاماسىمەن جۇزەگە اسىرىلعان «اتامەكەنىم» اكسياسى اياسىندا ۇيىمداستىرىلدى.