شىعىس قازاقستان تاۋلارىندا قار كوشكىنى ءجۇرۋى مۇمكىن

وسىعان بايلانىستى، وڭىردەگى سەلدەن قورعاۋ مەكەمەسىنىڭ ماماندارى قاۋىپتىڭ الدىن الۋ شارالارىن وتكىزىپ جاتىر. بيىل تاۋ اراسىنان وتەتىن جولدارداعى قىرقالاردىڭ بويىندا قىرىقتان استام جاساندى جارىلىس جاسالىپ، 60 مىڭ تەكشە مەتر قار تۇسىرىلگەن. جالپى وڭىردە قار كوشكىنى بولاتىن 500 گە جۋىق قاۋىپتى اۋماق بار. ونىڭ 336 سى قىستا ۇنەمى باقىلاۋدا بولادى. ول ايماقتاردا ەلدى مەكەندەر ورنالاسقان ءارى كولىك جولدارى وتەدى. ال قارى قالىڭ ماڭدارعا ارنايى بەلگىلەر قويىلعان.

بيىل تاۋلى وڭىردە قاردىڭ قالىڭدىعى 1 مەترگە جەتىپ قالعان.

«ءبىزدىڭ فيليالدا 21 باقىلاۋشىمىز بار. كۇن سايىن ولار قاداعالاپ قار جاۋعاننان كەيىن وزدەرىنىڭ مارشرۋتتارىمەن قاردىڭ قالىڭدىعىن تەكسەرەدى. قاردىڭ ىشكى قۇرىلىسىن تەكسەرەدى. قاردىڭ تەمپراتۋراسىن تەكسەرىپ، سودان بىزگە حابارلاپ، ءبىز قورىتىندى جاسايمىز. سول بويىنشا ءار جەرلەردە پروفيلاكتيكا جاسايمىز»، - دەيدى «قازاقستان سەلدەن قورعاۋ» م م وبلىستىق فيليالى باسشىسىنىڭ ورىنباسارى ەسىمحان باتىبايەۆ.