شاش جۋا الامىز با؟

 استانا. قازاقپارات - شاش كۇتىمى - وڭاي ءىس ەمەس. ءبىز شاشتى كۇندەلىكتى جۋىپ جۇرسەك تە، دۇرىس جۋۋ ەرەجەلەرىن بىلمەۋىمىز مۇمكىن. ول قانداي ەرەجەلەر؟

1. شاشتى جۋماس بۇرىن سۋمەن شايىڭىز.

ىستىق سۋ شاشتىڭ قابىرشاقتارىن اشىپ، اراسىنداعى كىردى كەتىرۋگە كومەكتەسەدى. ال جىلى سۋ باس تەرىسىنەن بولىنەتىن مايدى شايۋعا ىقپال ەتەدى. ال بۇل، ءوز كەزەگىندە، سۋسابىن قۇرامىنداعى پايدالى ەلەمەنتتەر دۇرىس ءسىڭۋىن قامتاماسىز ەتەدى.

2. شاشىڭىز ۇزىن بولسا، سۋسابىننىڭ الدىندا شاشقا ارنالعان كونديتسيونەر قولدانىڭىز.

ءيا، بۇل كەڭەس ءبىرشاما سۇراقتار تۋعىزۋى مۇمكىن. سەبەبى ءبىز كونديتسيونەردى تەك شاشتى جۋعاننان كەيىن پايدالانىپ ۇيرەنگەنبىز. ءبىراق ونى سۋسابىنعا دەيىن قولدانسا، ول شاشتى ۇشتانۋدان ساقتاپ قانا قويماي، شاش قابىرشاقتارىنىڭ زاقىمدانعان بولىكتەرىن قالىپقا كەلتىرۋگە كومەكتەسەدى.

3. سۋسابىندى تەك شاشتىڭ تامىرىنا جاعىڭىز.

سۋسابىندى بۇكىل شاشقا جاعۋدىڭ قاجەتى جوق. ءبىرىنشى كەزەكتە باس تەرىسىنە جاقىن ورنالاسقان شاش مايلانادى. ول - شاشتىڭ جاڭا، جاس بولىگى. ال شاشتىڭ ەسكى بولىگى - شاشتىڭ ۇشى وعان قاراعاندا از مايلانادى. سول سەبەپتەن، شاشتىڭ ءتۇبىن سۋسابىنمەن مۇقيات جۋىپ، ۇشتارىن كوبىكپەن جۋعان جەتكىلىكتى. سۋسابىندى كوپ مولشەردە قولدانۋدىڭ قاجەتى جوق.

4. ابايلاپ ۋقالاڭىز.

شاشقا سۋسابىن جاققاننان كەيىن ابايلاپ ۋقالاڭىز. ەڭ دۇرىسى - ۆەرتيكالدى تۇردە جوعارىدان تومەنگە قاراي شاشتى ىسقىلاپ جۋۋ. تىرناقتارىڭىزبەن باستىڭ تەرىسىن تىرناۋدان اۋلاق بولىڭىز.

5. شاشتى ءبىر رەت جۋعان جەتكىلىكتى.

سوڭعى كەزدە شاشتى ەكى رەت جۋۋ كەرەك دەگەن اقپارات تاراپ ءجۇر: ءبىرىنشى رەت سۋسابىن شاشتىڭ كىرىن كەتىرەدى، ال ەكىنشى رەت قۇرامانداعى پايدالى ەلەمەنتتەرىن بەرەدى. جوعارىدا كەلتىرىلگەن ءبىرىنشى كەڭەستى ەستە ۇستاپ، جۋار الدىندا جاقسىلاپ تۇرىپ سۋمەن شايىپ الساڭىز، سۋسابىندى ءبىر رەت قانا پايدالانعان جەتكىلىكتى.

6. كونديتسيونەردى شاشتىڭ ورتاسىنان ۇشتارىنا قاراي جاعىڭىز.

شاشقا ارنالعان كونديتسيونەردى شاشتىڭ تۇبىنە جاقپاعان دۇرىس. بۇل شاشتى اۋىرلاتىپ، كولەمىن جوعالتۋعا اكەپ سوعادى. كونديتسيونەردى شاشتىڭ ورتاسىنان باستاپ ۇشىنا دەيىن جاعىپ، نەعۇرلىم ۇزاق ۇستاساڭىز، سوعۇرلىم شاشقا جاعىمدى اسەر ەتەدى.

7. شاشتى سالقىن سۋمەن شايىڭىز.

سالقىن سۋ شاشتىڭ قابىرشاقتارىن تەگىستەپ، ءبىر- بىرىنە تىعىز ورنالاسۋدى قامتاماسىز ەتەدى.

8. شاشىڭىزعا ساي سۋسابىن تاڭداڭىز.

شاشىڭىز قۇرعاق بولسا، ىلعالداندىراتىن سۋسابىن قولدانىڭىز. شاشىڭىز بويالعان بولسا، بوياۋدى ساقتايتىن ارنايى سۋسابىندى تاڭداڭىز. ال شاشقا قوسىمشا كولەم بەرەتىن سۋسابىندار ادەتتە قالىپتى شاشقا ارنالعان.

9. شاشتى ۋاقىتىلى جۋىپ تۇرىڭىز.

«شاشتى اپتاسىنا قانشا رەت جۋۋ كەرەك؟» دەگەن سۇراققا ناقتى جاۋاپ جوق. ول تەك ءسىزدىڭ شاشىڭىزعا بايلانىستى. ەگەر شاشىڭىز تەز مايلاناتىن بولسا، كۇندەلىكتى جۋعان ابزال. قۇرعاق شاشتى اپتاسىنا 2-3 رەت جۋسا جەتكىلىكتى.

10. شاماڭىز كەلگەنشە فيلتردەن وتكەن سۋدى پايدالانىڭىز.

كەي جاعدايدا شاشىڭىزدى بارلىق ەرەجەنى ساقتاي وتىرىپ جۋساڭىز دا، ناتيجەسى كوڭىلدەن شىقپاۋى مۇمكىن. مۇنداي جاعدايدا سۋعا ءمان بەرىڭىز. سۋ نەعۇرلىم ناشار بولسا (تۇز قوسپالارى كوپ، حلوردىڭ كولەمى شامادان تىس، ت. ب. )، شاش سوعۇرلىم زاقىمدانۋى مۇمكىن.