وقۋعا تۇسە الماعان جاستاردىڭ ارنايى باتالوندا ديپلوم الۋىنا بولادى

استانا. قازاقپارات - ق ر  ۇ ق ك شەكارا قىزمەتىندە جاڭا باتالون قۇرىلادى. اتالعان قۇرىلىمنىڭ نەگىزگى ماقساتى - كيبەرقاۋىپسىزدىك سالاسىنداعى مامانداردى دايارلاۋ، دەپ حابارلايدى قازاقپارات ءتىلشىسى.

ق ر ۇلتتىق قاۋىپسىزدىك كوميتەتىنىڭ وكىلى سەرگەي جۋراۆليەۆتىڭ ايتۋىنشا، جاقىن كۇندەرى شەكارا قىزمەتىندە اقپاراتتىق قاۋىپسىزدىك باتالونى اشىلادى. وعان تۇسكەن جاستار ادەتتەگىدەي ءبىرجىلدىق مەرزىمدى اسكەري بورىشىن وتەيدى. ءبىراق ولاردى كيبەرقاۋىپسىزدىككە ۇيرەتۋ شارالارىنا باسىمدىق بەرىلەدى.

«مىسالى، وقۋعا تۇسە الماعان جاستار بولادى عوي. ءدال وسى جاستاردى ءبىز جاڭا باتالونعا تارتىپ، اقپاراتتىق قاۋىپسىزدىككە ۇيرەتەتىن بولامىز. وسىعان وراي، «اقپاراتتىق قاۋىپسىزدىك مامانى» دەگەن جاڭا اسكەري ماماندىقتى ەنگىزدىك. قازىر ءبىلىم جانە عىلىم مينيسترلىگىمەن اتالعان ماماندىقتى كاسىپتىك ءبىلىم تۋرالى ديپلوممەن تەڭەستىرۋ ماسەلەسىن زەردەلەپ جاتىرمىز. وسىنىڭ ارقاسىندا كيبەرقاۋىپسىزدىك بويىنشا مامانداردى كوبىرەك دايارلاۋعا مۇمكىندىك بولادى»، - دەدى س. جۋراۆليەۆ ق ر پارلامەنت سەناتىندا وتكەن جيىندا.

 ونىڭ سوزىنە قاراعاندا، جاڭا باتالونعا اقپاراتتىق تەحنولوگيالارعا بەيىم جاستار عانا قابىلدانادى. قىز بالالار دا اتالعان قۇرىلىمعا بارا الادى. «ەڭ باستىسى، جاستار اقپاراتتىق تەحنولوگيالاردى ءتۇسىنۋى كەرەك. ءبىر جىل بويى ولار شەكارا قىزمەتىنىڭ ينفراقۇرىلىمىن قورعايتىن بولادى. ال ساباقتار ۇلتتىق قاۋىپسىزدىك كوميتەتىنىڭ اكادەمياسىندا ۇيىمداستىرىلادى. اسكەري بورىشتىڭ مەرزىمى اياقتالعاننان كەيىن ولار اقپاراتتىق قاۋىپسىزدىك سالاسىنىڭ مامانى رەتىندە شىعادى. مەن ءوزىم يزرايلدە بولدىم. ول جاقتا اسكەردىڭ قۇرامىندا كيبەرقاۋىپسىزدىك قۇرىلىمدارى بار. وعان مەكتەپ وقۋشىلارىن ىرىكتەۋ 10- سىنىپتان باستالادى. سوندا ءبىر ورىنعا 100 ادام ۇمىتكەر رەتىندە تىركەلەدى. سەبەبى ولار اتالعان قۇرىلىمنان وتكەننەن كەيىن جۇمىسقا تۇرا الاتىنىن انىق بىلەدى»، - دەپ اتاپ كورسەتتى س. جۋراۆليەۆ.

اۆتور: ارمان اسقاروۆ