بەيبىت اتامقۇلوۆ عارىشقا ۇشىرىلعان جەر سەرىكتەرى تۋرالى ايتىپ بەردى

استانا. قازاقپارات - ا ق ش- تان ۇشىرىلعان قازاقستاندىق جەر سەرىكتەرى شتاتتىق رەجيمدە جۇمىس ىستەپ جاتىر، دەپ حابارلايدى قازاقپارات ءتىلشىسى.

ق ر قورعانىس جانە ايەروعارىش ونەركاسىبى ءمينيسترى بەيبىت اتامقۇلوۆتىڭ ايتۋىنشا، تۇنگى ساعاتتا 00:32-دە ا ق ش- تىڭ كاليفورنيا شتاتىندا «Falcon SpaceX» زىمىران تاسىعىشى ءساتتى ۇشىرىلدى. وندا ەكى قازاقستاندىق جەر سەرىگى بولدى.

«ءبىز كەشە تاڭەرتەڭ ەشتەڭە حابارلاعان جوقپىز. سەبەبى ءبىزدىڭ جەر سەرىكتەرىمىز وربيتاعا شىعۋى ءتيىس ەدى. قازىرگى كەزدە ولار وربيتاعا ءساتتى شىعىپ، جۇمىس ىستەي باستادى. وسى ۋاقىتقا دەيىن ءبىز ءتورت سيگنالدى قابىلدادىق. استانا مەن الماتىداعى ستانسالارعا سيگنالدار ءتۇستى. بۇدان بولەك، بريتاندىق ارىپتەستەرىمىز دە بارلىق سيگنالداردى كوردى. ءبىر سوزبەن ايتقاندا، عارىشقا ۇشىرىلعان جەر سەرىكتەرىمىز شتاتتىق رەجيمدە جۇمىس ىستەپ جاتىر»، - دەدى ب. اتامقۇلوۆ ۇكىمەت وتىرىسىنان كەيىن جۋرناليستەرگە بەرگەن سۇحباتىندا.

ءمينيستردىڭ سوزىنە قاراعاندا، قازىرگى كەزدە جەر سەرىكتەرىن رەتكە كەلتىرۋ شارالارى اتقارىلىپ جاتىر. جوسپار بويىنشا ەكى اپتادان كەيىن ءتيىستى مالىمەتتەر تۇسە باستايدى.

«ماسەلەن، ەكىنشى جەر سەرىگىمىزدە جەردى قاشىقتان ءتۇسىرۋ اپپاراتۋراسى بار. ودان العاشقى سۋرەتتەر تۇسەتىن بولادى. ايتا كەتەر جايت، ءبىر جەر سەرىگىن تولىعىمەن وتاندىق ينجەنەرلەر جيناپ شىقتى. ەكىنشىسى بريتاندىق ارىپتەستەرىمىزبەن بىرلەسىپ شىعارىلدى. سوندىقتان وسى جەر سەرىكتەرى ارقىلى ءبىز وتاندىق ءونىمدى سىناقتان وتكىزەتىن بولامىز. بولاشاقتا جەردى قاشىقتان ءتۇسىرۋ سەرىگىن بارىنشا ءوزىمىز جينايمىز دەگەن جوسپار بار»، - دەپ اتاپ كورسەتتى ب. اتامقۇلوۆ.

اۆتور: ارمان اسقاروۆ