ءانشى ساكەن مايعازيەۆ جاڭا قىزمەتكە تاعايىندالدى
«بۇگىن ءبىزدىڭ اكادەميانىڭ وقىتۋشىلىق- پروفەسسورلىق قۇرامىنا جاڭا پرورەكتورىمدى تانىستىردىم. ت. جۇرگەنوۆ اتىنداعى قازاق ۇلتتىق ونەر اكادەمياسىنىڭ شىعارماشىلىق جۇمىستار جانە حالىقارالىق بايلانىستار جونىندەگى پرورەكتورى بولىپ قازاقستاننىڭ ەڭبەك سىڭىرگەن قايراتكەرى ساكەن مايعازيەۆ تاعايىندالدى. ەلىمىزدىڭ مادەني كەڭىستىگىندە ءوز ورنى، ءوز جولى بار تۇلعا، كاسىبي ونەر شەبەرى رەتىندە ساكەن قورداباي ۇلى جاڭا قىزمەتتە ابىروي بيىگىنەن كورىنىپ، عىلىمي- شىعارماشىلىق سالادا سان اسۋلاردى باعىندىراتىنىنا سەنەمىن! ءبىزدىڭ مەملەكەتىمىزدە قاراپايىم ازاماتتارعا تالانت، كاسىبيلىك، شەبەرلىك، ەڭبەكقورلىق، تىنباي ىزدەنىستىڭ ارقاسىندا بيىك بەلەستەردى باعىندىرۋعا بولاتىنىنا ساكەن مايعازييەۆتىڭ ءومىرى مەن ونەر جولى - جارقىن ۇلگى»، - دەپ جازدى ول.
سونداي- اق رەكتور جەلىدەگى جازباسىندا ۇلكەن وتباسىنىڭ توعىزىنشى پەرزەنتى ونەر الەمىندەگى بارلىق اسۋلاردى ءوزىنىڭ ماقساتشىلدىعى مەن ەڭبەكقورلىعى ارقىلى باعىندىرعاندىعىن ايتادى.
«ءبىلىم الۋ جولىندا - كوللەدج، اكادەميادا باكالاۆر، ماگيستراتۋرا، دوكتورانتۋرا سەكىلدى باسپالداقتاردان ءوتتى. سوناۋ توقسانىنشى جىلداردىڭ ورتاسىندا «ءمولدىر مونشاقتار» دەپ ءان اۋەلەتكەن ونەرگە عاشىق، مولدىرلىك پەن تازالىققا جانى ىڭكار جاس تالانت ساكەن مەن قازاقستاننىڭ ايتۋلى قايراتكەر ازاماتى ساكەن مايعازيەۆتىڭ اراسىندا جيىرما جىلدان استام ۋاقىت توگىلگەن ماڭداي تەر، تىنىمسىز جۇمىس، ىزدەنىس، كاسىبي شەبەرلىكتىڭ ءىزى جاتىر. اكەنىڭ اماناتىنا ادال ۇل، انانىڭ اياۋلى پەرزەنتى رەتىندە ساكەن قورداباي ۇلى - تەك ءبىر اۋلەتتىڭ عانا ەمەس، ەل ماقتانىشىنا اينالعان ازامات! ءوزى دە ونەگەلى وتباسىنىڭ يەسى. ساكەن - ءارقاشان دا مارتەبەڭ ۇستەم بولسىن!»، - دەپ جازدى جوعارى وقۋ ورنىنىڭ باسشىسى.