بوكس: «استانا ارلانس» كلۋبى تاراتىلادى
مۇنداي شەشىمدى قازاقستان بوكس فەدەراتسياسىنىڭ ۆيتسە- پرەزيدەنتى دانيار ءابىلعازين بۇگىن فەدەراتسيا جۇمىسىنىڭ جىلدىق قورىتىندىسىنا بايلانىستى استانادا وتكەن جيىندا ءمالىم ەتتى، دەپ حابارلايدى قازاقپارات ءتىلشىسى.
««استانا ارلانس» بويىنشا ءبىزدىڭ پرەزيدەنت بۇل جوبادان شىعۋ تۋرالى شەشىم قابىلدادى. كەلەسى ماۋسىمدا ءبىز قاتىسپايمىز. ياعني، بۇل كوماندانى تاراتامىز. بۇل تالقىلانبايدى. كوماندا بۇكىالەمدىك WSB بوكس سەرياسىندا ەڭ كوپ جۇلدەگە يە بولدى. ونىڭ قۇرامىندا قازاقستاندىق وليمپيادا چەمپيوندارى ونەر كورسەتتى. ءبىزدىڭ كوماندا - WSB- دە ءۇش رەت چەمپيون بولعان بىردەن- ءبىر كوماندا» ، - دەدى دانيار ءابىلعازين.
ەسكە سالا كەتسەك، بۇگىنگى جيىندا بەلگىلى بيزنەسمەن كەڭەس راقىشيەۆ قازاقستان بوكس فەدەراتسياسىنىڭ حالىقارالىق بايلانىستار بويىنشا ۆيتسە- پرەزيدەنتى بولىپ سايلانعان بولاتىن. بۇگىن فەدەراتسيا جۇمىسىنىڭ جىلدىق قورىتىندىسىنا بايلانىستى استانادا وتكەن جيىندا بوكس فەدەراتسياسىنىڭ جاڭا ۆيتسە- پرەزيدەنتى تانىستىرىلدى. ال وعان دەيىن اتالمىش قىزمەتتى الماسادام ساتقاليەۆ اتقارعان ەدى.