ۇلى بريتانيادا پىشاقتان جاسالعان پەرىشتە ەسكەرتكىش قويىلدى

 استانا. قازاقپارات - ۇلى بريتانيانىڭ ليۆەرپۋل قالاسىندا 100 مىڭ پىشاقتان جاسالعان پەرىشتە ەسكەرتكىشى قويىلدى. سۋىق قارۋ قۇرباندارىنا ارنالعان ءمۇسىن پوليتسيانىڭ تاركىلەگەن پىشاق، قانجار، ۇستارا جۇزىنەن جاسالعان.

بىرەگەي ەسكەرتكىشتى سوعۋعا 1 جىلداي ۋاقىت كەتكەن. ول شاھارداعى كافەدرالدىق شىركەۋدىڭ الدىنا قويىلدى. ءمۇسىن اۆتورى الفي برەدلي «پىشاقتى پەرىشتە» ادامداردىڭ نازارىن سۋىق قارۋ قولدانۋمەن بايلانىستى ماسەلەگە اۋدارىپ، مۇنداي قىلمىستىڭ ازايۋىنا سەپتىگىن تيگىزەر»، - دەيدى.

 ال رەسمي مالىمەتكە سۇيەنسەك، ۇلى بريتانيادا جىل باسىنان قازان ايىنا دەيىن پىشاقتى قولدانۋمەن 39 مىڭ قىلمىس تىركەلگەن.

 الفي برەدلي، ءمۇسىنشى:

 - ەسكەرتكىشكە پىشاقتىڭ بارلىق ءتۇرىن پايدالاندىم دەسەم بولادى. ونىڭ ىشىندە قاساپشىنىڭ دا، ۇزىن قانجارلار، ءتىپتى قاراپايىم اس ءۇي پىشاقتارى دا بار. سوڭعىسىنىڭ جارتىسىنان كوبى بالالاردان تاركىلەنگەن. بۇل وكىنىشتى جايت. ونى ولار كوبىنە قورعانامىز دەپ الىپ جۇرگەن.

www.24.kz