استاناداعى جەر ءۇستى مەتروسىنىڭ باعاسى تۋرالى ايتتى
«بۇگىن ءبىرقاتار ب ا ق پەن الەۋمەتتىك جەلىلەردە ەلوردادا تۇرعىزىلىپ جاتقان جەڭىل رەلستى كولىكپەن جول ءجۇرۋ اقىسى تۋرالى حابارلاما تاراعان بولاتىن. اتالعان حابارلامالار بويىنشا ساراپشىلار جول ءجۇرۋ اقىسىن ەسەپتەپ شىعارعان. الايدا كەلتىرىلگەن مالىمەتتەر شىندىققا ساي كەلمەيدى. قازىرگى ۋاقىتتا جوبا ءالى قۇرىلىس ساتىسىندا. سوندىقتان، ەلوردا ءۇشىن جاڭا كولىكتىڭ جول ءجۇرۋ اقىسىن تاپ باسىپ ايتۋ ورىنسىز»، - دەلىنگەن كومپانيانىڭ سايتىندا.
حابارلانىپ وتىرعانداي، قارجىلىق- ەكونوميكالىق نەگىزدەمەنى ازىرلەۋ كەزىندە جول ءجۇرۋ الدىن الا باعاسى 200 تەڭگە بولىپ ەسەپتەلگەن.
«ءبىز ۋاقىت تالابىنا جانە الەمدىك ستاندارتتارعا ساي كەلەتىن كولىكتىك جۇيەنى ىسكە قوسۋعا تىرىسامىز. سوندىقتان، الداعى ون جىلعا كوز سالا ءبىلۋىمىز كەرەك. ل ر ت جەلىسى - كەلەشەكتە قالانىڭ ءوسىپ كەلە جاتقان قاجەتتىلىگىن قاناعاتتاندىرۋ باعىتىنداعى قوعامدىق كولىكتەردى دامىتۋدا جاسالعان تاعى ءبىر قادام»، - دەپ حابارلايدى كومپانيادان.
ەسكە سالا كەتسەك، وسى جىلدىڭ جازىندا استانا قالاسىنىڭ اكىمى بولىپ تۇرعان كەزىندە اسەت يسەكەشيەۆ ەلورداداعى جەڭىل رەلستى ترامۆايدىڭ جايى تۋرالى ايتىپ بەرگەن بولاتىن. شاھار باسشىسى سول كەزدە جەڭىل رەلستى ترامۆايدىڭ باعىتىن قاي جاقتا ۇزارتۋ كەرەكتىگى تۋرالى ماسەلە تالقىلانىپ جاتقانىن اتاپ وتكەن. ءبىر نۇسقا بويىنشا، جەلىنى قابانباي باتىر داڭعىلى بويىنشا تىكە تارتىپ، ودان ارى تۇران ارقىلى «سارى ارقا» ساۋدا ورتالىعى، «كەرۋەن- سيتي» جاققا جەلى جالعاسۋى مۇمكىن. تاعى ءبىر نۇسقا نەگىزىندە جەڭىل رەلستى ترامۆاي قالالىق ساياباق ارقىلى وڭ جاعالاۋعا ءتۇسىپ كەتۋى ىقتيمال. سونىمەن بىرگە، LRT قۇرىلىسىن جاڭا تەمىر جول ۆوكزالىنان باستاپ، ابىلاي حان داڭعىلى ارقىلى ەسكى ۆوكزالعا تارتۋ جوسپارى دا بار.
بۇل جوبانىڭ قۇنى 665 ميلليارد تەڭگەگە تەڭ. ونىڭ قۇرىلىسىمەن قىتايلىق كومپانيالار كونسورتسيۋمى اينالىسادى. شەتەلدىكتەر قول قويىلعان كەلىسىم شارتقا سايكەس، بۇل جوبانى تولىقتاي جۇزەگە اسىرادى. ياعني بۇكىل قاجەتتى تەحنيكانى ورناتىپ، بولاشاقتا مۇندا قىزمەت كورسەتەتىن جۇمىسشىلاردى وقىتادى.
قازىرگى كەزدە قۇرىلىسشىلار جۇيەنىڭ ىرگەتاسىن قالاپ، بيىكتىگى 7-12 مەترگە جەتەتىن ەستاكادالاردىڭ تىرەكتەرىن ورناتىپ جاتىر. بۇل جۇمىسقا 121 تەحنيكا مەن 2262 ادام جۇمىلدىرىلعان. جاڭا كولىك ءتۇرى ەلوردالىق «نۇرلى جول» ۆوكزالى مەن نۇرسۇلتان نازاربايەۆ اۋەجايىن بايلانىستىرادى. ول «ەكسپو» حالىقارالىق كورمەسى مەن «ابۋ دابي پلازا» كەشەنى ارقىلى وتەدى. جوسپار بويىنشا بۇل باعىتتى 30 مينۋت ىشىندە وتۋگە بولادى. كولىك جىلدامدىعى ساعاتىنا 40 شاقىرىمدى قۇرايدى. 2020 -جىلى 1 تاۋلىك ىشىندە ونى شامامەن 146 مىڭ ادام پايدالانادى دەگەن جوسپار بار. جاڭا جۇيە 18 ستانسيا، 19 كولىك پەن 1 دەپودان تۇرادى.
اۆتور: ايان بەكەن ۇلى