08:57, 04 - جەلتوقسان 2018 | GMT +5
كىر تاسىن كوتەرۋشى قازاقستاندىق ازيانى مويىنداتتى
كوكشەتاۋ. قازاقپارات- اقمولالىق دەنيس دولگاشوۆ كىر تاسىن كوتەرۋدەن ازيا چەمپيونى اتاندى، دەپ حابارلايدى قازاقپارات ءتىلشىسى وبلىستىق دەنە شىنىقتىرۋ جانە سپورت باسقارماسىنىڭ باسپا ءسوز قىزمەتىنە سىلتەمە جاساپ.
ۆەدومستۆونىڭ مالىمەتى بويىنشا وڭتۇستىك كورەيانىڭ پۋسان قالاسىندا كىر تاسىن كوتەرۋدەن ءبىرىنشى ازيا چەمپيوناتى ءوتتى.
بايراقتى جارىسقا وڭتۇستىك ازيا، جاپونيا، موڭعوليا، قازاقستان، رەسەي جانە وزبەكستان ەلدەرىنەن جينالعان بىلەكتى سپورتشىلار قاتىستى. جۇزدەگەن سپورتشى بىرنەشە كۇن بويى ءتۇرلى سالماق بويىنشا ءوزارا كۇش سىناستى. ونىڭ ىشىندە قازاقستان رەسپۋبليكاسى اتىنان سىنعا تۇسكەن اقمولالىق دەنيس دولگاشوۆ 63 كەلى سالماقتاعىلار اراسىندا قارسىلاستارىنان باسىم ءتۇسىپ، ازيا چەمپيونى اتاندى.
دەنيس جارقايىڭ اۋداندىق بالالار مەن جاس وسپىرىمدەردىڭ سپورت مەكتەبىندە تالىمگەرى قالىبەك سالتاناتتىڭ جەتەكشىلىگىمەن جاتتىعادى.