پاۆلوداردا اۋىل ازاماتتارى حان ابىلايدىڭ ەرلىك جورىعىن دارىپتەيتىن ەسكەرتكىش بەلگى ورناتتى
«ابىلاي، نايزا مەكەنى» نەمەسە «شابانباي جايىلىمى» دەپ اتالاتىن تاريحي جەر باسكول اۋىلىنىڭ ىرگەسىندە جاتىر. بابالاردىڭ ءىزى قالعان كيەلى مەكەن جايىندا اڭىز-اڭگىمەلەر شەجىرەشىلەردەن جانە اۋىل اقساقالدارىنان جەتكەن.
جاۋگەرشىلىك زاماندا جوڭعار شاپقىنشىلارى قالماق قىرىلعان تاۋىنىڭ ەتەگىندە ۇلكەن تويتارىسقا ۇشىرايدى. ءدال سول جولى جاۋعا قارسى اتوي سالعان قالىڭ اسكەر شابانباي دەگەن داۋلەتتى ادامنىڭ جايىلىمىنا كەلىپ ءۇش كۇن ايالداپتى. جاۋجۇرەك باتىرلاردىڭ جولسوقتى كەيپىن كورگەن جومارت جان حان ابىلايدىڭ قاراماعىنداعى جاساققا 500 سايگۇلىك مىنگىزىپ، كيىم-كەشەك پەن اس-سۋلارىن ازىرلەپ بەرگەن دەسەدى. ەندى بۇل جەر تاريحشىلاردىڭ نازارىن اۋدارتىپ وتىر.
«ءوز اسكەرىمەن ات ءدۇبىرىن توقتاتقان، مىنا نايزاسىن قاداعان جەرگە بۇگىنگى كۇنى ەسكەرتكىش تۇرعىزىلىپ وتىر. وسى ەسكەرتكىش بولاشاق ۇرپاقتى ءتول تاريحىن بىلۋگە، تاربيەلەۋگە، باعالاۋعا، ماقتان تۇتۋعا تاربيەلەيدى دەپ ەسەپتەيمىن»، - دەيدى تاريحشى ايگۇل مۇحامەدياروۆا.