جەڭىس سەيدۋللا ۇلى: ۇلتتىق قۇندىلىقتارىمىزدى بارىنشا دارىپتەيتىن ءداۋىر تۋدى

استانا. قازاقپارات - «قازاقكونسەرت» مەملەكەتتىك كونسەرتتىك ۇيىمىنىڭ ديرەكتورى، قازاقستاننىڭ ەڭبەك سىڭىرگەن قايراتكەرى جەڭىس سەيدۋللا ۇلى ەلباسىنىڭ «ۇلى دالانىڭ جەتى قىرى» ماقالاسى مەن جۋىقتا تۇساۋى كەسىلگەن «ەلباسى جولى. استانا» فيلمىنە قاتىستى پىكىرىن ءبىلدىردى،

 دەپ حابارلايدى قازاقپارات ءتىلشىسى.

«ونەر سالاسىنداعى ەڭ ماڭىزدى باعىتتاردىڭ ءبىرى - كينو. بۇگىنگى تاڭدا حالىق ساناسىن جاڭعىرتۋدىڭ نەمەسە قالىپتاستىرۋدىڭ باستى ءارى ەڭ ءتيىمدى قۇرالىنا اينالعان كينو سالاسىنىڭ وزەكتىلىگى كۇن سايىن ارتا تۇسۋدە. بۇل تۋرالى ەلباسى نۇرسۇلتان نازاربايەۆ ءوزىنىڭ «ۇلى دالانىڭ جەتى قىرى» ماقالاسىندا «قازىرگى زامانداعى حالىقتاردىڭ تاريحي تانىم- تۇيسىگىندە كينو ونەرى ەرەكشە ورىن الادى. جالپى حالىقتىڭ ساناسىندا فيلمدەردەگى جارقىن كينووبرازدار ىرگەلى عىلىمي مونوگرافيالارداعى دەرەكتى پورترەتتەردەن گورى ماڭىزدىراق ءرول اتقارادى» دەپ ەرەكشە اتاپ وتكەن بولاتىن»، - دەيدى ول.

جەڭىس سەيدۋللا ۇلىنىڭ ايتۋىنشا، قازاق كينوسىنىڭ قازىرگى دامۋ جاعدايى جاڭاشا باستامالارعا تولى كەزەڭ. سەبەبى ونىڭ باستى ماقساتى - وتكەن تاريحىمىزدى تۇگەندەۋ، تاريحي سانانى جاڭعىرتۋعا اسەر ەتۋ، كەلەشەكتەگى جوسپارىمىزدى ايقىنداۋ. «رۋحاني جاڭعىرۋ» باعدارلاماسى اياسىنداعى يگى باستامالاردىڭ ناتيجەلەرىنە زەر سالىپ قاراساق، ءقازىر ۇلتتىق قۇندىلىقتارىمىزدى بارىنشا دارىپتەيتىن ءداۋىر تۋدى. ەڭ باستىسى، ماڭگىلىك ەلدىڭ ماڭگىلىك مۇراسى بولاتىنداي ۇلتتىڭ رۋحىن كوتەرەتىن تۋىندىلار جاسالىپ جاتىر. سولاردىڭ ءبىرى - كۇنى كەشە تۇساۋكەسەرى وتكەن «ەلباسى جولى. استانا» فيلمى.

 قازاقستان رەسپۋبليكاسى تۇڭعىش پرەزيدەنتى كۇنىنە وراي رەجيسسەر اقان ساتايەۆتىڭ تارتۋ ەتكەن كارتينانى تاماشالاۋعا مەملەكەت باسشىسى ن. ءا. نازاربايەۆتىڭ ءوزى كەلدى. تاۋەلسىز قازاقستان ەلورداسىنىڭ قالىپتاسۋ تاريحىنداعى ەلباسىنىڭ ءرولى تۋرالى باياندالعان فيلمنىڭ العاشقى كورسەتىلىمى «قازاقستان» ورتالىق كونسەرت زالىندا ءوتتى»، - دەيدى جەڭىس سەيدۋللا ۇلى.

قازاقستاننىڭ ەڭبەك سىڭىرگەن قايراتكەرى ءوز سوزىندە وتاندىق كينو سالاسىنداعى ماڭىزدى وقيعاعا اينالعان فيلمنىڭ «قازاق كونسەرت» مەملەكەتتىك كونسەرتتىك ۇيىمى ەڭبەك ەتەتىن ونەر وشاعىندا كورسەتىلۋى ءوزى ءۇشىن ۇلكەن مارتەبە ەكەنىن ايتادى.

«جازىق دالادا ءوسىپ تۇرعان ۇلكەن ەكزوتيكالىق گۇلدىڭ وبرازىنداعى بىرەگەي، تەڭدەسى جوق كەشەندى قۇرۋ يدەياسىن مەملەكەت باسشىسى ۇسىنعان ەدى. 2009 -جىلى ەلباسىنىڭ باستاماسىمەن اشىلعان ەلوردا تورىندەگى «قازاقستان» ورتالىق كونسەرت زالىنىڭ تەحنيكالىق مۇمكىندىكتەرى «ەلباسى جولى. استانا» كوركەم فيلمىنەن العان جاقسى اسەردى ەسەلەي ءتۇستى. ونەر - ءومىردىڭ ايناسى دەمەكشى، مەملەكەت تاريحىنداعى ەلەۋلى وقيعالاردىڭ نەگىزىندە جاسالعان كوركەم فيلم سول كەزدەگى ءومىر شىندىعىن انىق ءارى ناقتى كورسەتە بىلگەن. كورەرمەن قاۋىم زور ىقىلاسپەن قابىل العان بۇل تۋىندى ەڭسەلى ەلىمىزدىڭ ەلورداسىن جاڭادان قۇرىپ، بارشا الەمگە پاش ەتكەن ۇلت كوشباسشىسىنىڭ قيىن ساتتەردە قابىلداعان تاريحي شەشىمدەرىن باعالاۋعا، تەرەڭ سەزىنۋگە ىقپال ەتتى»، - دەپ ءتۇيدى جەڭىس سەيدۋللا ۇلى.

ەسكە سالا كەتسەك، 30 - قاراشا كۇنى ق ر پرەزيدەنتى نۇرسۇلتان نازاربايەۆ ەلوردا جۇرتشىلىعىمەن بىرگە «ەلباسى» كينوەپوپەياسىنىڭ «استانا» اتتى فيلمىن تاماشالاعان بولاتىن.