ەلباسى دجوردج ۋوكەر بۋشقا كوڭىل ايتۋ جەدەلحاتىن جولدادى
مەملەكەت باسشىسى امەريكا قۇراما شتاتتارىنىڭ 41- پرەزيدەنتى دجوردج گەربەرت ۋوكەر بۋشتىڭ قايتىس بولعانى تۋرالى حاباردى زور كۇيزەلىسپەن قابىلدادى.
«ءسىزدىڭ اكەڭىز ءوز ەلىنىڭ ناعىز پاتريوتى بولدى ءارى امەريكانىڭ وركەندەۋىنە ادال قىزمەت ەتتى. ول قىرعي- قاباق سوعىستىڭ اياقتالۋىنا جانە جاھاندىق قاۋىپسىزدىكتى ساقتاۋعا زور ۇلەس قوسقان اسا كورنەكتى مەملەكەت قايراتكەرى رەتىندە الەم تاريحىندا وشپەس ءىز قالدىردى.
قازاقستان حالقى دجوردج بۋشتى ەكى جاقتى دوستىق قارىم- قاتىناستى ورناتۋعا جانە ونى نىعايتۋعا كوپ كۇش جۇمساعان دانا ساياساتكەر رەتىندە ءاردايىم ەستە ساقتايتىن بولادى. ول - ءبىزدىڭ تاۋەلسىزدىگىمىزدى العاش مويىنداعان كوشباسشىلاردىڭ ءبىرى.
ءبىز دجوردج بۋش ەكەۋىمىز جاقسى دوس بولدىق جانە ءجيى كەزدەسىپ تۇردىق. ونىڭ تەحاستاعى رەزيدەنسياسىندا، اسىرەسە 2006 -جىلى كەننەبانكپورتتاعى ۇيىندە ماعان كورسەتكەن قوناقجايلىعىن ءارقاشان جىلى سەزىممەن ەسكە الامىن.
بارشا قازاقستان حالقىنىڭ جانە جەكە ءوزىمنىڭ اتىمنان سىزگە جانە بۇكىل امەريكا حالقىنا كوڭىل ايتامىن»، - دەلىنگەن جەدەلحاتتا.
امەريكا قۇراما شتاتتارىنىڭ 41- پرەزيدەنتى بولعان ۇلكەن دجوردج بۋش 30 - قاراشا كۇنى 95 جاسقا قاراعان شاعىندا ومىردەن وزدى.