پولشا اۋەجايىندا قازاقتىڭ كۇيى ورىندالدى
فريدەريك شوپەن اتىنداعى اۋەجايدا دومبىرا، قوبىز جانە جەتىگەن ءبىر ۋاقىتتا كۇيدەن شاشۋ شاشتى. شارا ق ر تۇڭعىش پرەزيدەنتى كۇنى مەرەكەسىنە ورايلاستىرىلعان.
ەرەكشە اۋەندى ەستىگىسى كەلگەن جولاۋشىلار كوپتەپ جينالدى. كەيىن اۋەزدى مۋزىكانىڭ ىرعاعىمەن بىرگە بي بيلەپ، ءماز- مەيرام بولدى. جەكەلەگەن كورەرمەندەر شارانى سمارتفوندارىنا ءتۇسىرىپ، قىزىقتى قويىلىم ءۇشىن ريزاشىلىقتارىن ءبىلدىردى.
پولشا اۋەجايىنداعى كونسەرتتى جۇرگەنوۆ اتىنداعى ۇلتتىق ونەر اكادەمياسىنىڭ مۋزىكانتتارى قويدى. بۇل ولاردىڭ قازاقستاننىڭ تۇڭعىش پرەزيدەنتى كۇنىنە وراي شەتەلدىكتەرگە جاساعان توسىن سىيى بولدى.
«مۇنداي قويىلىمدى العاش رەت كورىپ وتىرمىن. ادامداردىڭ ءبارى ريزا. ويتكەنى ۇلى دالا مۋزىكاسى ۆارشاۆانىڭ ورتالىعىندا وينالدى. ءوزىم مۋزىكاعا جاقىن اداممىن. سوندىقتان وسىندا شىرقالعان ءان- كۇي دە، بيلەنگەن بي دە وتە كەرەمەت بولدى. ۇلكەن راحمەت»، - دەدى لەونيد ەسىمدى جولاۋشى.
«ماعان مۋزىكا مەن بي وتە قاتتى ۇنادى. ءسىزدىڭ ەلدىڭ مادەنيەتى مەن مۋزىكاسى ادەمى. قازاقستاندا بولعان ەمەسپىن. ءبىراق ونداي مۇمكىندىك تۋىپ جاتسا، قۋانا- قۋانا بارامىن. استانانىڭ سۋرەتتەرىن كورگەن ەدىم، شاھار بىردەن ۇنادى»، - دەيدى كورەرمەن بولعان اۋەجايدىڭ تاعى ءبىر جولاۋشىسى حاننا.