18:14, 01 - جەلتوقسان 2018 | GMT +5
اقوردادا ق ر پرەزيدەنتىنىڭ شتاندارتى كوتەرىلدى
استانا. قازاقپارات - بۇگىن «اقوردا» رەزيدەنتسياسى الدىنداعى الاڭدا قازاقستان رەسپۋبليكاسى پرەزيدەنتىنىڭ شتاندارتىن سالتاناتتى تۇردە كوتەرۋ ءراسىمى ءوتتى.
بۇل تۋرالى قازاقپارات اقوردانىڭ باسپا ءسوز قىزمەتىنە سىلتەمە جاساپ حابارلايدى.
ەلباسىنىڭ شتاندارتىن كوتەرۋ ءراسىمىن وتكىزۋ ءۇشىن رەزيدەنتسيا الدىندا ق ر مەملەكەتتىك كۇزەت قىزمەتى، «ايبىن»، پرەزيدەنت پولكىنىڭ قۇرمەتتى قاراۋىلى ساپ تۇزەدى.
بۇدان كەيىن شتاندارت سالتاناتتى جاعدايدا كوتەرىلىپ، ءانۇران ورىندالدى. قازاقستان تاريحىندا تۇڭعىش رەت مەملەكەت باسشىسىنىڭ بايراعى 1995-جىلدان قولدانىلا باستادى.
شتاندارت رەسپۋبليكا پرەزيدەنتىنىڭ توسبەلگىسى ىسپەتتى، مەملەكەتتىڭ جوعارى لاۋازىمدى تۇلعاسىنىڭ رەسمي ايىرىم بەلگىسى بولىپ سانالادى. ول ەلباسىنىڭ استاناداعى رەزيدەنتسياسىندا تۇرادى جانە ونىڭ كولىكتەرىندە بولادى.