مەملەكەت باسشىسى زياتكەرلىك مەكتەپتەر وقۋشىلارىنا كەڭەسىن بەردى
«بىزگە وڭتايلى قارقىندى ساقتاپ، دامۋدىڭ جاڭا باعىتتارىن ايقىنداۋ ماڭىزدى. بىرىنشىدەن، سيفرلاندىرۋدى كەڭىنەن ەنگىزۋ كەرەك. بۇل باعىتتا ەلىمىزدە ءتيىستى جۇمىستار اتقارىلۋدا، ارنايى مەملەكەتتىك باعدارلاما ىسكە اسىرىلىپ جاتىر. قازىرگى كەزدە سيفرلىق تەحنولوگيالارمەن جۇمىس ىستەي الاتىن جاڭا ماماندار سۇرانىسقا يە. سىزدەردى مەكتەپتەن باستاپ بۇل قاجەتتى سالاعا دايىنداپ جاتىرمىز»، - دەدى مەملەكەت باسشىسى.
وسى ورايدا پرەزيدەنت زياتكەرلىك مەكتەپتەر وقۋشىلارىنىڭ جەتىستىكتەرىن اتاپ ءوتتى.
«الداعى 10-15 جىلدا جاساندى ينتەللەكت، اۆتوماتتاندىرۋ تەحنولوگيالارى ءبىزدىڭ ءومىرىمىزدىڭ اجىرامايتىن بولىگىنە اينالادى. بۇگىندە تەك ازيادا 5 ميلليون بالا روبوت تەحنيكاسىن تەرەڭدەتىپ وقىپ جاتىر، 15 ميلليون بالا ІТ- تەحنولوگيا باعىتىندا ءبىلىم الۋدا. ولار جاساندى ينتەللەكت پەن روبوت جۇزدەگەن كاسىپتى الماستىراتىن بولاشاققا تابىستى تۇردە دايىندالۋدا»، - دەدى ن. نازاربايەۆ.
ەلباسى وسى دودادان ەلىمىز قالىپ قويماۋى ءتيىس ەكەنىن، ءبىلىم مەن بىلىكتىلىككە ەكپىن قويۋ كەرەكتىگىن قاداپ ايتتى.
«ەكىنشىدەن، جاڭا تەحنولوگيالاردى ىلگەرىلەتۋ قاجەت. الەمدە بۇل سالا كۇن سايىن جەتىلدىرىلىپ جاتىر، ۇنەمى يننوۆاتسيالىق تىڭ جوبالار جارىققا شىعۋدا. ءاربىر ءۇش-بەس جىلدا جاڭا كاسىپتەر پايدا بولۋدا. ساراپشىلاردىڭ پايىمىنشا، 2030-جىلعا قاراي كومپيۋتەرلەر 400-500 ميلليون جۇمىسشىنى الماستىرادى، 375 ميلليون ادام ماماندىقتارىن اۋىستىرىپ، جاڭا داعدىلاردى مەڭگەرۋگە ءماجبۇر بولادى. سوندىقتان تەز وزگەرىسكە ۇشىرايتىن كەزەڭدە باسەكەگە قابىلەتتى بولۋ ءۇشىن سىزدەرگە زاماناۋي تەحنولوگيالاردى جەتە مەڭگەرگەن وتە ماڭىزدى»، - دەدى مەملەكەت باسشىسى.
زياتكەرلىك مەكتەپتەر قۇرۋ جونىندەگى جوبا 2008-جىلدىڭ ناۋرىز ايىنان جۇزەگە اسىرىلا باستادى. بۇگىندە ەلىمىزدە جاراتىلىستانۋ- ماتەماتيكا باعىتىنداعى 20 زياتكەرلىك مەكتەپ اشىلدى. 2010-2018-جىلدار ارالىعىندا وسى وقۋ ورىندارىن 8 مىڭعا جۋىق تۇلەك ءتامامدادى. 950 وقۋشى «التىن بەلگى» مەن ەرەكشە اتتەستاتقا يە بولدى.
اۆتور: رۋسلان عابباسوۆ