نۇرسۇلتان نازاربايەۆ بولاشاق ۇرپاققا حات جازىپ قالدىردى

استانا. قازاقپارات - ق ر پرەزيدەنتى نۇرسۇلتان نازاربايەۆ بولاشاق ۇرپاققا ارنالعان حات جازدى، دەپ حابارلايدى قازاقپارات ءتىلشىسى.

بۇگىن استانادا وتكەن «نازاربايەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنىڭ 10 جىلدىعىنا ارنالعان فورۋمدا وقۋشىلار ەلباسىنا «ۋاقىت كاپسۋلاسىن» ۇسىنىپ، اتالمىش مەكتەپ تۇلەكتەرىنە امانات حات جازىپ قالدىرۋدى سۇرادى.

«وسىنداي ەرەكشە ماڭىزدى مەيرام كۇنى العاشقى زياتكەرلىك مەكتەپكە «ۋاقىت كاپسۋلاسىن» تابىس ەتكىمىز كەلەدى. وسىعان بايلانىستى نازاربايەۆ زياتكەرلىك مەكتەپتەرىنىڭ 2068-جىلعى تۇلەكتەرىنە امانات حات جازىپ قالدىرۋدى وتىنەمىز»، - دەدى اتالعان مەكتەپتىڭ تۇلەگى، نازاربايەۆ ۋنيۆەرسيتەتىنىڭ ستۋدەنتى ابىلاي ساتىلحان.

مەملەكەت باسشىسى جاستاردىڭ سۇراۋىنا قولداۋ ءبىلدىردى.

«بۇل 2068-جىلعى ۇرپاققا ارنالعان. قازاقتا «ەلۋ جىلدا ەل جاڭا» دەگەن ءسوز بار. ول كەزدە جاڭا تەحنولوگيالار بولادى، ادامدار 100-120 جىل جاساۋى مۇمكىن. سوندىقتان، قۇداي بۇيىرتسا، وسى جەتىستىكتەردى سول كەزدە كورەسىزدەر، بۇل حاتتى اشىپ، وقيسىزدار»، - دەدى نۇرسۇلتان نازاربايەۆ.