ەلىمىزدەگى «قىمبات» قالادا ەڭبەك ەتەتىن مۇعالىمگە قانداي جەڭىلدىكتەر قاراستىرىلۋدا
ول تۋرالى ءبىلىم جانە عىلىم مينيسترلىگىندە وتكەن باسقوسۋدا «پەداگوگتار مارتەبەسى تۋرالى» زاڭ جوباسىن دايارلاۋشى جۇمىس توبىنىڭ مۇشەسى، استانا قالاسىنىڭ گۋمانيتارلىق كوللەدجىنىڭ ديرەكتورى ەلدوس نۇرلانوۆ تارقاتىپ ايتىپ بەردى، دەپ حابارلايدى قازاقپارات ءتىلشىسى.
«جىلدىق ەڭبەك دەمالىسى بەرىلگەندە بۇگىنگى تاڭدا ازاماتتىق قىزمەتكەرلەرگە جاتاتىن، ياعني مەكەمەلەر مەن قازىنالىق كاسىپورىندار فورماسىندا ەڭبەك ەتەتىن پەداگوگتار جىلىنا ءبىر رەت ساۋىقتىرۋعا ارنالعان ءبىر لاۋازىمدىق ايلىق اقىعا تەڭ جاردەماقى الادى. ءبىز بۇل كولەمدى بىردەن ەكى ەسەگە ارتتىرۋدى، مۇمكىن بولسا تەك ازاماتتىق قىزمەتكەرلەرگە عانا ەمەس، قالعان پەداگوگتارعا بەرۋ مۇمكىندىگىن ۇسىنىپ وتىرمىز»، - دەيدى ول.
ەلدوس نۇرلانوۆتىڭ ايتۋىنشا، جالپى وقۋ ورىندارى جەرگىلىكتى اتقارۋشى ورگانداردىڭ قۇزىرىندا، قارجىلاندىرۋىندا بولعاندىقتان، ولارعا قوسىمشا كوتەرمەلەۋ، ىنتالاندىرۋ شارالارىن جۇزەگە اسىرۋعا قۇقىق بەرۋ كەرەك.
«سونىڭ ىشىندە مىسالى ايماقتىق «ۇزدىك پەداگوگ» بايقاۋىن وتكىزۋ ءجون بولادى. ءىرى - استانا، الماتى قالالاردا ءومىر ايتارلىقتاي قىمبات. سوعان بايلانىستى ءتيىستى ۇستەماقى قاراستىرۋ مۇمكىندىگىن، تۇرعىن ءۇي سەرتيفيكاتىن بەرۋ، پەداگوگتاردىڭ بالالارىنا بالاباقشادا كەزەكتەن تىس ورىن بەرۋ، ساناتوري ساپارى جانە قوعامدىق كولىكتە ءجۇرىپ تۇرۋىنىڭ اقىسىن وتەۋ، جاس مۇعالىمدەردىڭ قىزمەت ەتۋىنە كومەكتەسەتىندەي جاردەماقى قاراستىرۋ ۇسىنىلۋدا. ويتكەنى، ءار ايماقتىڭ مۇمكىندىگى ءارتۇرلى. دەگەنمەن، مۇنداي مۇمكىندىك بولعان جاعدايدا تەكسەرۋشى ورگانداردىڭ تاراپىنان سۇراقتار بولماس ءۇشىن، مۇنداي قۇقىقتىڭ بارىن ءبىلىپ ءجۇرۋى ءۇشىن بۇل نورمانىڭ زاڭ جوباسىندا قارالعانى ماڭىزدى دەپ شەشتىك»، - دەيدى ەلدوس نۇرلانوۆ.
ەسكە سالا كەتسەك، مەملەكەت باسشىسى نۇرسۇلتان نازاربايەۆ قازاقستان حالقىنا جولداۋىندا 2019 -جىلى قازاقستاندا «پەداگوگتاردىڭ مارتەبەسى» تۋرالى زاڭ قابىلداۋ كەرەكتىگىن ايتقان ەدى.