استانادا «ەلباسى جانە تۇركىستان» كورمەسى اشىلدى
ق ر مادەنيەت جانە سپورت مينيسترلىگى مەن «ازىرەت سۇلتان» مەملەكەتتىك تاريحي-مادەني قورىق-مۋزەيىنىڭ ۇيىمداستىرۋىمەن اشىلعان كورمەدە 60-تان اسا جادىگەر قويىلعان، دەپ حابارلايدى قازاقپارات ءتىلشىسى.
كورمەنىڭ ءبىرىنشى بولىمىندە ەلباسى ن. ءا. نازاربايەۆتىڭ 1985 -جىلى قازاق س س ر مينيسترلەر كابينەتىنىڭ باسشىسى، ەگەمەندى، تاۋەلسىز قازاقستاننىڭ تۇڭعىش پرەزيدەنتى تۇسىنداعى باۋىرلاس تۇركيا رەسپۋبليكاسىنىڭ پرەزيدەنتتەرى تۇرعىت وزال، سۇلەيمەن دەميرەل، احمەت سەزار، ابدۋللا گۇل، رەدجەپ تايىپ ەردوعانمەن تۇسكەن سۋرەتتەرى ۇسىنىلعان.
سونداي-اق، ەكسپوزيتسيادا اعىمداعى جىلعى تۇركىستانداعى رەسمي ساپارلارىنان سىر شەرتەتىن فوتوسۋرەتتەرىن تاماشالاۋعا بولادى. ەكىنشى ءبولىم اۋليەلەردىڭ سۇلتانى اتانعان قوجا احمەت ياساۋي مۇراسىنا ارنالادى. وندا قوجا احمەت ياساۋيدىڭ ارتىندا قالعان باعا جەتپەس مۇرالارى ХVІІІ عاسىرعا ءتان «ديۋاني حيكمەت» كىتابىنىڭ قولجازبا جانە باسپا نۇسقالارى، ⅩⅨ عاسىردا قايتا كوشىرىلگەن «ريسوللا ءدار ادابي تاريقات»، «ناسابناما» شەجىرەسى بار. بۇدان بولەك، ۇلى تۇلعانىڭ شاكىرتتەرى س. باقىرعانيدىڭ «ديۋان»، شەيح حۋدايداد تاش-مۋحاممەد ءال- بۋحاريدىڭ «بۋستان ۋل مۋحيببيننىڭ» تۇركى تىلىندە جازىلعان قولجازبا ەڭبەگى، ءا. ناۋايدىڭ «عازالدارى»، سوفى اللاياردىڭ «مۋسليك ال- مۋتتاكين»، «اۋليەنىڭ وسيەتتەرى»، قوجا حافيزدىڭ «ديۋانى»، يمام ماعرۋديدىڭ «قيسسالارى»، اۋليە بيدەلدىڭ «ديۋان» ەڭبەكتەرى ورنالاستىرىلعان.
كورمەنىڭ ءۇشىنشى ءبولىمى تۇركىستان وڭىرىندەگى كيەلى ورىندار مەن تاريحي ەسكەرتكىشتەر جايىنداعى فوتوسۋرەتتەرگە ارنالعان.
