اۋىل جاستارىن «بولاشاقپەن» كوبىرەك وقىتۋ ۇسىنىلدى

استانا. قازاقپارات - «اۋىل» حالىقتىق-دەموكراتيالىق پاتريوتتىق پارتياسى «بولاشاق» باعدارلاماسىمەن اۋىل جاستارىن كوبىرەك وقىتۋدى ۇسىنىپ وتىر، دەپ حابارلايدى قازاقپارات ءتىلشىسى.

پارتيا باسشىسى ءالي بەكتايەۆتىڭ ايتۋىنشا، بۇگىندە «بولاشاق» حالىقارالىق باعدارلاماسى اياسىندا شەتەلدە ءبىلىم الىپ جاتقان جاستار كوپ. ءبىراق اۋىلدىڭ جاستارى تىم از. اۋىل شارۋاشىلىعى بويىنشا وقىپ جاتقاندار دا ساناۋلى.

«نەگىزى، پاتريوت جاستاردىڭ كوبىسى اۋىلدا تۇرادى. ونى مويىنداۋىمىز قاجەت. ال اۋىل مەكتەپتەرىندەگى ءبىلىم ساپاسىنىڭ تومەندىگى، بولماسا، مۇعالىمدەردىڭ اۋىلعا بارمايتىندىعى - بۇنىڭ ءبارى اۋىل جاستارىنىڭ كىناسى ەمەس قوي. سولاي ەمەس پە؟ بالالار كىمنەن ءبىلىم الادى، سول بىلىممەن وقيدى، سول بىلىممەن وقۋعا تۇسۋگە تىرىسادى. سوسىن اۋىل بالاسى قالداعى بالالاردان ەش كەم ەمەس. اقىلى جاعىنان، پاراساتى جاعىنان، ال پاتريوتتىعى قالا جاستارىنان دا ارتىق. ءبىراق ولاردىڭ «بولاشاقتىڭ» تالابىنا ساي ءبىلىمى مەن دايىندىعى جەتىسپەي جاتادى. نازاربايەۆ ۋنيۆەرسيتىنە تۇسكىسى كەلەتىن جاستاردىڭ جاعدايى دا سولاي. تالاپتارى جوعارى. ءبىراق وقۋعا قابىلداۋ ءتارتىبى وتە قاتال. ءتىپتى، قالا تۇلەكتەرىنىڭ ءوزى ەلىمىزدىڭ ەڭ بەدەلدى ۋنيۆەرسيتەتىنىڭ ستۋدەنتى اتانۋ ءۇشىن قوسىمشا جەكە مەنشىك ورتالىقتارعا بارىپ، جىل ون ەكى اي دايىندالىپ جۇرەدى. ال اۋىل بالاسىندا ونداي مۇمكىندىك جوق»، - دەدى ءا. بەكتايەۆ پارتيانىڭ كەزەكتەن تىس XIV سەزىندە.

ونىڭ ايتۋىنشا، بۇگىندە مۇعالىمدەردىڭ بىلىكتىلىگى بىلاي تۇرسىن اۋىل مەكتەپتەرىنىڭ وقۋ-ادىستەمەلىك ءارى ماتەريالدىق بازاسى قالالىق مەكتەپتەرىمەن سالىستىرۋعا دا كەلمەيدى. زاماناۋي قۇرال-جادىقتاردى پايدالانۋ جاعىنان دا اۋىل مەكتەپتەرىنىڭ مۇمكىندىكتەرى شەكتەۋلى.

«سوندىقتان ءبىز بىرنەشە ۇسىنىستى ازىرلەدىك. بىرىنشىدەن، نازاربايەۆ زياتكەرلىك مەكتەبىنە ءتۇسۋ ءۇشىن اۋىل مەكتەپتەرىنىڭ 6-سىنىبىن بىتىرەتىن وقۋشىلارعا ارنايى دايىندىق كۋرستارىن ۇيىمداستىرۋ قاجەت. ەكىنشىدەن، ايماقتارداعى نازاربايەۆ زياتكەرلىك مەكتەپتەرىنە قابىلداۋ بارىسىندا اۋىل بالالارىنا كۆوتا ءبولۋ كەرەك دەپ ەسەپتەيمىز. ۇشىنشىدەن، نازاربايەۆ ۋنيۆەرسيتەتىنە، بولماسا، «بولاشاق» باعدارلاماسى بويىنشا شەتەلدەگى الدىڭعى قاتارلى ۋنيۆەرسيتەتتەرگە ءتۇسۋ ءۇشىن ارنايى سىناقتان وتكەن اۋىلدىڭ تۇلەكتەرىنە دايىندىق كۋرستارىن ۇيىمداستىرعان دۇرىس. اۋىلدىڭ بالالارىنا دا لايىقتى جاعداي جاسالۋى قاجەت»، - دەپ اتاپ كورسەتتى ءا. بەكتايەۆ.