تۇڭعىش پرەزيدەنت كۇنى: نازاربايەۆتىڭ سۇيىكتى كىتاپتارى كورمەگە قويىلدى
مەرەكە اياسىندا «تاۋەلسىزدىك جانە تۇڭعىش پرەزيدەنت» كىتاپ كورمەسى مەن «ۇلت تىرەگى - ەلباسى» فوتوكورمەسى اشىلدى.
«كورمەدە كىتاپحانا قورىنداعى پرەزيدەنت نازاربايەۆتىڭ قازاقستان تۋرالى، تاۋەلسىزدىك جىلدارىنداعى جەتىستىكتەر تۋرالى كىتاپتارى كورەرمەن نازارىنا ۇسىنىلىپ وتىر. ەلباسىنىڭ تاعدىرى قازاقستاننىڭ جانە تاۋەلسىزدىكتىڭ تاعدىرىمەن تىكەلەي بايلانىستى. ودان بولەك، نازاربايەۆتىڭ بوس ۋاقىتىندا ءسۇيىپ وقيتىن كىتاپتارى دا قويىلدى. فيلوسوف سەنەكادان ەلباسى ءجيى دايەكسوز كەلتىرەدى. سۇيىكتى اۆتورلار تىزىمىندە اباي قۇنانباي ۇلى، ساكەن سەيفۋلليندەر بار»، - دەدى ق ر ۇلتتىق اكادەميالىق كىتاپحاناسى ديرەكتورىنىڭ ورىنباسارى ءاليا قوجابەكوۆا.
«ۇلت تىرەگى - ەلباسى» فوتوكورمەسىندە «كازاحستانسكايا پراۆدا» گازەتىنىڭ فوتو ءتىلشىسى يگور بۋرگاندينوۆتىڭ، «ايقىن» گازەتىنىڭ فوتو ءتىلشىسى ايتجان مىرزانوۆتىڭ، «ليتەر» گازەتىنىڭ فوتو ءتىلشىسى سوۆەتبەك ماعزۇموۆتىڭ، «دەلوۆوي كازاحستان» گازەتىنىڭ فوتو ءتىلشىسى تالعات عالىموۆتىڭ جۇمىستارى قويىلدى.
«ەلباسى نۇرسۇلتان نازاربايەۆتىڭ 1997-جىلدان بەرى ءتۇسىرىپ كەلە جاتىرمىن. ءوزىم ءار جىلدارى «قازاقپارات» اگەنتتىگىندە، «ستوليچنوە وبوزرەنيە» گازەتىندە، «قازاقستان تەمىرجولشىسى»، «ستوليچنايا جيزن»، «ايقىن» باسىلىمدارىندا جۇمىس ىستەدىم. جۇمىس بارىسىندا پرەزيدەنتتى تۇسىرگەن سۋرەتتەرىم كوپ. سولاردىڭ اراسىنان ەڭ ۇزدىك 8 سۋرەتىمدى ىرىكتەپ، بۇگىنگى كورمەگە قويدى. جاس فوتوتىلشىلەرگە ايتارىم، بەدەلدى ادامدار قاتىساتىن شارالاردا ۋاقىت وتە تىعىز بولادى. سول از ۋاقىتتا مومەنتتى ءتۇسىرىپ ۇلگەرۋ كەرەك. كادردا ادامداردىڭ كوزقاراسى جانە كۇلىپ تۇرعانى ماڭىزدى. جارىقتىڭ دۇرىس ءتۇسۋىن دە قاداعالاۋ كەرەك»، - دەپ كەڭەس بەردى ايتجان مىرزانوۆ.
ايتا كەتەيىك، بيىل قازاقستان حالقى جەتىنشى رەت رەسپۋبليكامىزدىڭ تۇڭعىش پرەزيدەنتى كۇنىن اتاپ وتەدى. 2011-جىلدىڭ 10- جەلتوقسانىندا ق ر پارلامەنتى سەناتى دەپۋتاتتارىنىڭ باستاماسىمەن 1- جەلتوقسان - قازاقستان رەسپۋبليكاسىنىڭ تۇڭعىش پرەزيدەنتى كۇنى دەپ بەلگىلەندى.