قازاق كۇرەسىنەن وتەتىن «الەم بارىسىنا» قىتاي ۇيعىر بالۋانىن جىبەردى

 استانا. قازاقپارات - الماتى قالاسىندا 1-2- جەلتوقسان كۇندەرى تۇڭعىش پرەزيدەنت كۇنىنە وراي قازاق كۇرەسىنەن وتەتىن«الەم بارىسىنا» قىتاي ۇيعىر بالۋانىن جىبەردى، دەپ حابارلايدى قازاقپارات ءتىلشىسى.

ق ر قازاق كۇرەسى فەدەراتسياسىنىڭ باسپا ءسوز قىزمەتى تاراتقان بالۋاندار تىزىمىنە كوز جۇگىرتسەك، قىتاي ەلىنىڭ اتىنان جارىسقا قاتىساتىن جالعىز بالۋاننىڭ ۇيعىر ەكەنى بەلگىلى بولدى.

ونىڭ اتى-ءجونى - مامەت پارحات. بويىنىڭ ۇزىندىعى 180 سانتيمەتر، ال سالماعى 110 كەلى. 1983-جىلى دۇنيەگە كەلگەن بالۋان وسىعان دەيىن گرەك-ريم كۇرەسىنەن قىتاي چەمپيوناتىنىڭ كۇمىس جۇلدەگەرى (2013)، سونداي-اق، از ۇلتتار اراسىندا وتەتىن كۇرەس باسەكەلەرىنەن ەكى دۇركىن «پالۋان پاتشاسى» اتاعىنىڭ يەگەرى (2014، 2018) اتانىپتى.

ەندى ول الماتىدا قازاق كۇرەسىنەن وتەتىن «الەم بارىسىندا» باعىن سىناپ كورمەك.

ەستەرىڭىزگە سالا كەتەيىك، اتالعان تۋرنير 1-2-جەلتوقسان كۇندەرى الماتىداعى «بالۋان شولاق» اتىنداعى ستاديوندا وتەدى.

اۆتور: كۇنسۇلتان وتارباي