تۇركىستاندا ياساۋي مۋزەيى سالىنادى
تۇركىستان وبلىسىنىڭ اكىمى ەلباسىنىڭ ماقالاسىندا ايتىلعان مىندەتتەردى ورىنداۋعا بايلانىستى وڭىردە اتقارىلعان جۇمىستاردى بايانداپ، الداعى ۋاقىتتا ىسكە اسىرىلاتىن جوبالارمەن تانىستىردى.
«مەملەكەت باسشىسىنىڭ «ۇلى دالانىڭ جەتى قىرى» اتتى تاريحي ماقالاسى ەل ساناسىنا قوزعاۋ سالعان، «ماڭگىلىك ەل» بولۋ جولىنداعى ۇلى مىندەتتەردى ايقىنداپ بەرگەن، «بولاشاققا باعدار: رۋحاني جاڭعىرۋ» باعدارلامالىق ماقالاسىنىڭ جالعاسى، ءارى ەلدى بيىك ماقساتتارعا جەتەلەيتىن ماڭىزدى قۇجات. وسى قۇندى باعدارلاماداعى تاپسىرمالاردى ورىنداۋ ماقساتىندا تۇركىستان وبلىسىندا ءبىرقاتار جۇمىستار قولعا الىنىپ، قارقىندى جۇزەگە اسىرىلۋدا.
ماسەلەن، اتبەگىلىكتى، اڭشىلىقتى، سالت- ءداستۇردى ناسيحاتتاۋ ماقساتىندا وبلىستا ارنايى فەستيۆالدەر ۇيىمداستىرىلۋدا. سونداي- اق، « قىزىل كىتاپقا» ەنگەن، ياعني ايرىقشا قورعاۋدى قاجەت ەتەتىن قىزعالداق گۇلىن قورعاۋ جانە سول ايماقتىڭ تۋريستىك الەۋەتىن كوتەرۋ ماقساتىندا حالىقارالىق «قىزعالداق» شاراسى قولعا الىندى. ەلباسىنىڭ ايتۋلى ماقالاسىنىڭ «تۇركى الەمىنىڭ بەسىگى» دەپ اتالاتىن بولىمىندە تۇركىستان قالاسىندا تۋعان ياساۋي بابامىز بەن وتىراردان تۇلەپ ۇشقان ءال- فارابي عۇلاما تۋرالى دا ايتىلدى. بۇل باعىتتا دا تاريحي تۇلعالار مەن كونە قالالاردى ناسيحاتتاۋ ءۇشىن انيماتسيالىق فيلمدەر مەن تەلەحيكايالار ءتۇسىرىلدى. الداعى ۋاقىتتا قوعامدىق سانانى جاڭعىرتۋ باعدارلاماسىن جۇزەگە اسىرۋ باعىتىندا جاڭاشا جوبالاردى قولعا الۋدى جوسپارلاپ وتىرمىز»، - دەدى جانسەيىت تۇيمەبايەۆ.
سونداي- اق، وبلىس اكىمى 2019 -جىلى تۇركىستان وبلىسىندا «سايگۇلىكتەر» فەستيۆالى ۇيىمداستىرىلاتىنىن ايتتى. ۇلتتىق كودتى جاڭعىرتۋ ماقساتىندا وتكىزىلەتىن شارا اياسىندا ات سپورت ويىندارى: تەڭگە ءىلۋ، اۋدارىسپاق، قىز قۋۋ، جامبى اتۋ، سايگۇلىكتەر شەرۋى وتەدى. سونداي- اق ات ابزەلدەرى، اتتىلى جاۋىنگەرلەردىڭ كيىمى مەن قارۋ- جاراقتارىنا ارنالعان كورمەلەر، جىلقى مالىنا بايلانىستى جىر ءمۇشايراسى، جىرشىلار مەن تەرمەشىلەر بايقاۋىن ۇيىمداستىرۋ كوزدەلگەن. سونىمەن قاتار، «شىعىس بازارى» اتتى فەستيۆال وتكىزۋ جوسپارلانعان. ونداعى ماقسات قولا، مىس، تەمىر، كۇمىس، التىننان جاسالعان اشەكەي بۇيىمداردىڭ، تۇرمىستىق زاتتار مەن قارۋ- جاراقتاردىڭ جارمەڭكەسىن وتكىزۋ ارقىلى قازاق جەرى - مەتاللۋرگيا پايدا بولعان العاشقى ورتالىقتىڭ ءبىرى ەكەنىن پاش ەتۋ.
ودان بولەك، قوجا احمەت ياساۋيدىڭ تاريحي بولمىسىن جاھانعا ءوز دەڭگەيىندە تولىق تانىتىپ، ناسيحاتتاۋ ماقساتىندا ءبىرقاتار شارۋالار اتقارىلماق. اتاپ ايتقاندا، ەلباسى تاپسىرماسى بويىنشا، جاڭا تۇركىستاندا ياساۋي مۋزەيى سالىنباق. بۇل مۇراجايدا عۇلاما مەن ونىڭ شەت مەملەكەتتەردەگى شاكىرتتەرىنىڭ ەڭبەكتەرى قويىلادى. ياعني، ياساۋي فەنومەنىن جوعارىلاتىپ، اتىن اسقاقتاتۋ ارقىلى عىلىمدى عانا ەمەس، تۋريزمدى دە دامىتۋ مۇمكىندىگى اشىلا تۇسەدى. سونداي- اق، تۇركىستان قالاسىندا الەمنىڭ تۇكپىر- تۇكپىرىندە ياساۋي بابانىڭ عىلىمي مۇراسىن زەرتتەپ جۇرگەن ياساۋيتانۋشىلاردىڭ باسىن قوسىپ، حالىقارالىق كونفەرەنسيا وتكىزۋ مەجەلەنگەن. ياساۋي مۇرالارى كەشەندى تۇردە زەرتتەلىپ، دەرەكتى جانە كوركەم فيلمدەر تۇسىرىلەدى.