اينۇر تۇرسىنبايەۆا انشىلەردىڭ ءومىرىن وزگەرتىپ جىبەرگەن ءسوز قۇدىرەتى جايلى ايتتى
قالامگەر بىرنەشە مىسال كەلتىرە وتىرىپ، ءسوزدىڭ تالاي تانىمال تۇلعانىڭ ومىرىنە وزگەرىس اكەلگەنىن اتاپ ءوتتى.
«بۇگىن بالقاشتان قايتار جولدا ءبىراز دەمالايىنشى دەپ كوپتەگەن جاڭا اندەر تىڭدادىم. ىشىندە جاس ءانشى داۋلەت بولاتوۆتىڭ دا بىرنەشە ءانى بار ەكەن... سول جىگىتتىڭ ءبىر انىندە «وسى جان ساعىندى دەپ، جارالى جانىمدى ەمدەپ... كەلمەيسىڭ نەگە مەنى ىزدەپ؟» دەگەن جولدار بار ەكەن. قاتەلەسپەسەم، قازىر ول بالا قاتتى اۋىرىپ جاتىر. ياعني جارالى جانىنا ەم ىزدەۋدە»، - دەيدى اقىن.
تۇرسىنبايەۆا ونەردەگى دوستارى قىدىرالى مەن قاراقاتتىڭ بىرنەشە انىنە ءسوز جازعان. ايتۋىنشا، بۇل جۇلدىزدى جۇپ ەشقاشان دا بايانسىز ماحاببات تۋرالى شىرقامايدى. سوندىقتان دا ولاردى جۇرت ماحاببات سيمۆولى دەپ بىلەدى، - دەيدى تۇرسىنبايەۆا.
«مىسالى «ريزامىن ساعان»، «باعىم سەن»، «بيلەشى» ت. ب. قاراقات ءان ماتىنىنە ەشقاشان «قايداسىڭ عاشىعىم، سەنى ساعىندىم، سەنى ويلاپ ۇيىقتاي الماي قينالدىم» دەگەن سياقتى بايانسىز ماحابباتتى سۋرەتتەيتىن سوزدەردى قوسقىزبايدى. جانە ءبىز قاراقاتتى باقىتتى وتباسىنىڭ سيمۆولى رەتىندە باعالايمىز، شىندىعىندا سولاي»، - دەيدى ايتىسكەر.
سول سياقتى اينۇر تۇرسىنبايەۆا ءبىر كەزدەرى «ۇيىقتاپ كەتسەم ءبىر كۇنى ويانباي قالام» دەپ اندەتكەن مارقۇم تابىلدى دوسىموۆتى، «تىنىشتىق بەر جۇرەگىمە، قۇلاق اسپا تىلەگىمە... سەزىم شوقتى تىعىپ قويعام، جۇمىر جەردىڭ جۇرەگىنە» دەپ اندەتىپ، جول اپاتىنان كوز جۇمعان ءنابي ايمۇراتوۆتى ەسكە الدى.
«جارىقتىق ءمادينا اپامىز «قوش ەندى، قوش بول، كۇرەڭ كۇز» دەپ شىرقاعاندا ەرەكشە ءسۇيسىنىپ تىڭدايتىن ەدىك. كوپ ۇزاماي-اق كۇرەڭ كۇزدە جارىق جۇلدىزىمىزدان ايىرىلىپ قالامىز دەپ ويلادىق پا؟! كەيبىر اۋىر اندەردى تيتتەي بالاعا ايتقىزىپ قويىپ، ءماز بولامىز. نە دە بولسا باقىتتى شاقتى جىرلاپ، جاقسىلىقتى ناسيحاتتاپ، تىڭداعان جۇرتتى قۋانتىپ جۇرگەنگە نە جەتسىن؟! اسەرلى اندەر كوپ بولسىن»، - دەپ اياقتادى ءسوزىن اقىن.