ۋكراينا تۇركيادان بوسفور بۇعازىنان رەسەي كەمەلەرىن وتكىزبەۋدى سۇرايدى

 استانا. قازاقپارات - ۋكراينا اسكەري- تەڭىز كۇشتەرىنىڭ قولباسشىسى يگور ۆورونچەنكو كەرچ بۇعازىنداعى جانجالدان سوڭ كيەۆ تۇركيا بيلىگىنەن بوسفور بۇعازىنان رەسەي اسكەري كەمەلەرىن وتكىزبەۋدى سۇرايتىنىن مالىمدەدى.

ۋكراينا پرەزيدەنتى پەتر پوروشەنكو گەرمانيالىق Bild گازەتىنە بەرگەن سۇحباتىندا ۋكراينا ناتو- نى ازوۆ تەڭىزىنە كەمەلەرىن جىبەرۋگە شاقىراتىنىن مالىمدەگەن. پوروشەنكونىڭ سوزىنشە، رەسەي قىرىم مەن دونباسستى باسىپ العان سوڭ ۋكراينا اۋماعىنىڭ تاعى ءبىر بولىگىن تارتىپ الماققا تالپىنىپ جاتىر.

قارا تەڭىز بەن جەرورتا تەڭىزىن قوساتىن بوسفور جانە داردانەل بۇعازدارىنىڭ قۇقىقتىق مارتەبەسىن مونترە كونۆەنتسياسى رەتتەيدى. كونۆەنسيا بويىنشا، تۇركيا بۇعازدان قارا تەڭىز جاعاسىنداعى ەلدەردىڭ اسكەري كەمەلەرىن وتكىزۋگە مىندەتتى. سيرياداعى اسكەري وپەراتسياعا قاتىسقان رەسەيدىڭ قارا تەڭىز فلوتىنىڭ كەمەلەرى سوڭعى كەزدە بۇعازدان بىرنەشە رەت وتكەن.

الايدا، قارا تەڭىز جاعالاۋىندا ورنالاسپاعان، ياعني ناتو- نىڭ تۇركيا، بولگاريا جانە رۋمىنيادان باسقا ەلدەرىنىڭ اسكەري كەمەلەرىنە بۇعازدان وتۋدە ايتارلىقتاي شەكتەۋ ەنگىزىلگەن. ول كەمەلەردىڭ جالپى سالماعى 30 مىڭ توننادان اسپاۋى ءتيىس (وسىعان بايلانىستى بۇعازعا امەريكالىق «نيميتس» سياقتى اۆياتاسىعىش كەمەلەر كىرە المايدى) جانە ولار قارا تەڭىزدە 21 كۇننەن ارتىق جۇرە المايدى.

كونۆەنتسيادا تۇركيانىڭ سوعىس كەزىندە كەز- كەلگەن سوعىسۋشى ەلدەردىڭ كەمەلەرىن وتكىزبەي قويۋعا حاقى بارى كورسەتىلگەن. قازىر رەسەي ەشبىر ەلگە سوعىس جاريالاعان جوق. سونىمەن قاتار، تۇركيا ەگەر وزىنە باسقىنشىلىق قاۋپى تونسە بۇعازدى جابا الادى.

تۇركيا پرەزيدەنتى رەجەپ تايىپ ەردوعان 29 - قاراشا كۇنى تۇركيا كەرچ بۇعازىنداعى جاعدايعا بايلانىستى كيەۆ پەن ماسكەۋ اراسىندا ارا اعايىن بولا الاتىنىن مالىمدەدى. 28 - قاراشادا ەردوعان پەتر پوروشەنكومەن جانە ۆلاديمير پۋتينمەن سويلەسكەن. ەردوعان كەرچ بۇعازىنداعى جاعدايدى ارگەنتينادا «ۇلكەن جيىرمالىق»  (G20) ەلدەرىنىڭ سامميتىندە تالقىلايتىنىن ايتتى.

www.azattyq.org