ەليزابەت تۇرسىنبايەۆا قازاقستاننىڭ رەسەيدەگى ەلشىلىگىندە قوناقتا بولدى
ەمەن-جارقىن جاعدايدا وتكەن كەزدەسۋدە قازاقستاندىق سپورتشى ءوزىنىڭ سپورتتاعى ءومىرى، جەڭىس جولىنداعى قيىندىقتار مەن جەتىستىكتەرى تۋرالى باياندادى. وسى كۇندە سپورتشى رەسەيدە يۋليا ليپنيتسكايا، الينا زاگيتوۆا سىندى وليمپيادا چەمپيوندارى مەن الەمنىڭ ەكى دۇركىن جەڭىمپازى ەۆگەنيا مەدۆەديەۆانى جاتتىقتارعان تانىمال باپكەر ەتەري تۋتبەريدزەنىڭ قولىندا ءتالىم الۋدا. وسىعان دەيىن 5 جىل قاتارىنان ەليزابەت كانادالىق باپكەر برايان ورسەردىڭ جەتەكشىلىگىمەن جۇمىس ىستەگەن بولاتىن.
«برايانمەن ءبىز جاقسى كوڭىل-كۇيمەن قوش ايتىستىق. ول مەنى، مەنىڭ تاڭداۋىمدى قولدادى جانە مەنىڭ باپكەرىمە دە سەنىم ارتتى. مەن ونىڭ ماعان دەگەن قامقورلىعىنا، وسى ۋاقىتقا دەيىن ۇيرەتكەندەرىنە ءدان ريزامىن»، - دەدى مانەرلەپ سىرعاناۋشى.
«جالپى ءوز ۇيىنەن، وتباسىنان جىراقتا ءجۇرىپ جاتتىعۋ وتە قيىن. كەيدە جەتىستىگىڭدى ەسەلەي ءتۇسۋ ءۇشىن وزگەرىس قاجەت. مەن كەلەسى وليمپياداعا باسقاشا دايىندالعىم كەلەدى. ەتەري گەورگي قىزى وتە مىقتى باپكەر، مەن ءوزىمنىڭ ونىڭ توبىندا دايىندالۋعا مۇمكىندىك العانىما شەكسىز قۋانىشتىمىن»، - دەيدى ەليزابەت.
تۇرسىنبايەۆا مەن تۋتبەريدزە 2022-جىلى بەيجىڭدە وتەتىن قىسقى وليمپيادا ويندارىنا دەيىن بىرگە جۇمىس ىستەيتىن بولادى. 18 جاستاعى ەليزابەت ماسكەۋدە تۋعان، الايدا ول ءدۇبىرلى دودالاردا قازاقستان اتىنان ونەر كورسەتىپ ءجۇر. پحەنچحاندا وتكەن وليمپيادا ويىندارىندا 12- ورىنعا تابان تىرەدى. ول الەم چەمپيوناتتارىنداعى ۇزدىك كورسەتكىشىنە 2017-جىلى قول جەتكىزدى. ەليزابەت 2017-جىلى وتكەن قىسقى ازيا ويىندارىنىڭ جانە 2016-جىلعى جاس وسپىرىمدەر اراسىنداعى قىسقى وليمپيادا ويىندارىنىڭ قولا جۇلدەگەرى.
«ءبىز ءۇشىن قازاقستاندىقتاردىڭ دا، ءسىزدىڭ دە قولداۋىڭىز ماڭىزدى. سىزدەردىڭ ءبىزدىڭ جاعدايىمىزعا الاڭداۋشىلىق بىلدىرگەندەرىڭىزدىڭ ءوزى ءبىزدى الدىعا جەتەلەپ، بۇدان دا ۇلكەن بيىكتەردى باعىندىرۋعا ىنتىلاندىرادى. قازىر 2022-جىلعى وليمپيادا ويىندارىنا دايىندىق ءجۇرىپ جاتىر. سوندىقتان قازىر ءبىز ءۇشىن ءاربىر ءسات ماڭىزدى»، - دەپ اعىنان جارىلدى سپورتشىنىڭ اكەسى بايتاق تۇرسىنبايەۆ.